“ტრიბუნაზე გაშლილი დროშა რომ დაინახა, პირდაპირ ჩვენთან მოვიდა; უკეთილშობილესი ადამიანია, აუხდინა ოცნება ჩემს ბიჭს“ - რას წერს ქართველი ემიგრანტი ბუდუ ზივზივაძის შესახებ

გერმანიაში მცხოვრები ქართველი ემიგრანტი ბუდუ ზივზივაძის შესახებ ამაღელვებელ ისტორიას წერს.

ნათია კირთაძე ვიდეოსაც აქვეყნებს, სადაც ჩანს ქართველი ფეხბურთელის რეაქცია სამშობლოს დროშისა და ქომაგების დანახვისას:

“არ შემიძლია არ გაგიზიაროთ ჩვენი განცდილი სიხარული.

წლებია ვცხოვრობთ გერმანიაში, მიუხედავად იმისა, რომ ჩვენი შვილები დაიბადნენ გერმანიაში, არიან საქართველოს ნაკრების და თითოეული ფეხბურთელის დიდი გულშემატკივარი. გუშინ გვერგო პატივი მატჩის შემდეგ პირადად გვენახა ბუდუ. ჩვენი ბუდუ, ჯერ უკეთილშობილესი ადამიანი და მერე მაგარი ფეხბურთელია, აუხდინა ოცნება და დიდი სტიმული მისცა ჩემს ბიჭს (გადაწყვეტილი აქვს ფეხბურთელობა).

თამაშის შემდეგ, ტრიბუნაზე გაშლილი დროშა რომ დაინახა, პირდაპირ ჩვენთან მოვიდა, თანაც ორჯერ სურათებიც გადაიღო, ავტოგრაფებიც დაგვივირიგა და მოგვესიყვარულა. მეორე დღეა ჩემი ბიჭი თავს არ იბანს, ბუდუმ ხელი გადამისვაო. გოგოს (დიაბეტი აქვს) ემოციისგან მთელი ღამე კარგი შაქრები ქონდა. დიდი მადლობა მინდა გადავუხადო ჩვენს ოქროს ბიჭს გუშინდელი ემოციებისთვის.

P.S. გერმანელებსაც ანალოგიურად შეაყვარა თავი, სტადიონზე უმრავლესობა ბუდუს სკანდირებდა, ბუდუსივე მაისურებით“, - წერს ნათია კირთაძე.