ძლიერი წვიმა და ქარი ახმეტის მუნიციპალიტეტში - გადახდილია სახურავები, დაწყვეტილია ელექტროგადამცემი ხაზები, მოგლეჯილია ხეები
უამინდობამ ახმეტის მუნიციპალიტეტი დააზარალა. წვიმას თან ქარიშხალი და სეტყვა ერთოდა, რამაც სავარგულების ნაწილი გაანადგურა. სტიქია რამდენიმე წუთს გრძელდებოდა.
ამ დროის მონაცემებით, მუნიციპალიტეტის მასშტაბით ქარმა 10-მდე საცხოვრებელ სახლს, ასევე, პანკისის ხეობაში პოლიციის შენობას სახურავი გადახადა. დაწყვეტილია ელექტროგადამცემი ხაზები.
ძლიერმა ქარმა ასევე მოგლიჯა მრავალწლიანი ხეები და პანკისი-ახმეტა-თელავის მიმართულებით მოძრაობა შეაფერხა.
ადგილზე მუშაობენ სამაშველო ჯგუფები და მობილიზებულია მერიის ყველა შესაბამისი სამსახური.