მოსკოვზე დრონებით თავდასხმის ერთ-ერთი ყველაზე დიდი მცდელობა და საჰაერო განგაში კიევში - მორიგი მძიმე ღამე რუსეთ-უკრაინის ომში: რა ხდება კურსკის ოლქში?
არსებული მონაცემებით, უკრაინა რუსეთში, კურსკის ოლქის ტერიტორიის 1260 კვადრატულ კილომეტრსა და 93 დასახლებულ პუნქტს აკონტროლებს. ამის შესახებ უკრაინის შეიარაღებული ძალების მთავარსარდალმა ალექსანდრ სირსკიმ განაცხადა.
“კურსკის ოლქის ტერიტორიაზე შეტევის წარმოების პერიოდში უკრაინის შეიარაღებული ძალები მოწინააღმდეგის თავდაცვის 28-დან 35 კილომეტრამდე სიღრმეში შევიდნენ, დაიკავეს ტერიტორიის 1263 კვადრატული კილომეტრი და კონტროლი დაამყარეს 93 დასახლებულ პუნქტზე”, - განაცხადა მან.
- უკრაინის შეიარაღებული ძალების მთავარსარდალის ინფორმაციით, ახლა რუსები სამჯერ მეტ ჭურვებს ხარჯავენ, ვიდრე უკრაინელები.
“რუსული ჯარები დღე-ღამეში დაახლოებით 44 ათას ჭურვს ისვრიან, რაც სამჯერ მეტია, ვიდრე უკრაინის შეიარაღებული ძალები ხარჯავს“, - განაცხადა სირსკიმ.
მისი თქმით, 6-დან 14 აგვისტომდე რუსულმა არტილერიამ 400 ათასი ჭურვი ისროლა, ანუ დღეში საშუალოდ 44,5 ათასი.
21 აგვისტოს, ღამის განმავლობაში ვითარება დაძაბული იყო.
-
როსტოვის ოლქში, ნავთობის საცავში კიდევ ერთი ტანკი აფეთქდა
ადგილობრივი წყაროების ინფორმაციით, ნავთობის საცავს, რომელიც ისევ იწვის, უკრაინული უპილოტო საფრენი აპარატები კიდევ დაესხნენ თავს, სამშაბათს საღამოს იქ კიდევ ერთი ტანკი აფეთქდა. წინასწარი ინფორმაციით, აფეთქების შედეგად არავინ დაშავებულა.
რუსეთის ხელისუფლების ცნობით, ხანძრის ლიკვიდაციას 600-ზე მეტი მაშველი ცდილობს.
-
რუსეთმა “შაჰედები“ აამოქმედა - უკრაინამ კი მოსკოვის მიმართულებით თავისი დრონები
რუსული მხარის ინფორმაციით, უკრაინის არმია რუსეთში მდებარე სტრატეგიულ სამიზნეებს “კამიკაძე“ დრონებით ესხმის თავს.
ხოლო უკრაინის საჰაერო ძალები და უკრაინის სადამკვირვებლო არხები იუწყებიან, რომ ხერსონისა და ნიკოლაევის რაიონებში რუსულმა მხარემ ჯამში ორ ათეულამდე "შაჰიდი" გაუშვა.
რუსული მონიტორინგის არხი “პრიგრანიჩიე“ ირწმუნება, რომ ვოლოკონოვკაში, ბელგოროდის რაიონში, ჩამოვარდნილმა უპილოტო აპარატმა საცხოვრებელ კორპუსს ცეცხლი წაუკიდა;
ბრიანსკის რეგიონის გუბერნატორის ალექსანდრე ბოგომაზმას ინფორმაციით, საჰაერო თავდაცვის სისტემამ ბრაიანსკის ოლქის თავზე, შვიდი უკრაინული დრონი ჩამოაგდო.
“ერთი საათის განმავლობაში საჰაერო თავდაცვის ძალებმა აღმოაჩინეს და გაანადგურეს უკრაინის თავდაცვის ძალების შვიდი უპილოტო საფრენი აპარატი“, - წერს იგი. მისი თქმით, ნგრევა და მსხვერპლი არ ყოფილა.
კიევის რეგიონშიც საჰაერო განგაშის სიგნალი იყო ჩართული - მიზეზი რუსული უპილოტო დრონების მოგერიება გახდა.
რეგიონული ადმინისტრაციის ინფორმაციით, საჰაერო თავდასხმის გაფრთხილება კვლავ ძალაშია უკრაინის აღმოსავლეთ რეგიონის უმეტეს ნაწილში.
-
უკრაინულმა დრონებმა მოსკოვზე შეტევა სცადეს
რუსული მედიის ინფორმაციით, საჰაერო თავდაცვის სისტემებმა მოსკოვის მიმართულებით გაშვებული სამი შეტევა მოიგერიეს - როგორც ოფიციალური წყაროები ამბობენ, ეს იყო მოსკოვზე დრონებით მიტანილი ყველაზე მასშტაბური შეტევა.
”თავდაცვის სამინისტროს საჰაერო დაცვის ძალებმა პოდოლსკის ურბანულ რაიონში მოსკოვის მიმართულებით გაშვებული დრონების კოლონა მოიგერიეს. წინასწარი მონაცემებით, თავდასხმას მსხვერპლი არ მოჰყოლია. შემთხვევის ადგილზე სასწრაფო დახმარების ბრიგადები მუშაობენ“, - წერს მედია.
მოგვიანებით ცნობილი გახდა, რომ მოსკოვში კიდევ ოთხი დრონი ჩამოაგდეს
მოსკოვის მერმა სერგეი სობიანინმა განაცხადა, რომ გუშინ ღამით სულ 10 უკრაინული დრონი ჩამოაგდეს.
“ეს არის მოსკოვზე თავდასხმის ერთ-ერთი ყველაზე დიდი მცდელობა. ჩვენ ვაგრძელებთ სიტუაციის მონიტორინგს“, - წერს ის "ტელეგრამაში".
-
პარალელურად ცნობილი ხდება, რომ კურსკის რეგიონში უგზო-უკვლოდ დაკარგულებს ეძებენ
კურსკის ოლქის უკრაინის მიერ ოკუპირებული ტერიტორიებიდან 122 ათასზე მეტი ადამიანის ევაკუაცია განხორციელდა. ასევე ახლობლები ეძებენ, მინიმუმ, ორიათას ადგილობრივს, რომლებიც კავშირზე არ გამოდიან.
მათ რუსეთის წითელი ჯვრის მოხალისეები ეძებენ მათ. უმეტეს შემთხვევაში, დაკარგულები არიან მოხუცები, რომლებსაც ევაკუაცია დამოუკიდებლად არ შეეძლოთ.
-
რუსეთის თავდაცვის სამინისტროს ცნობით, საერთო ჯამში 45 დრონი ჩამოაგდეს
რუსეთის თავდაცვის სამინისტროს მიერ გავრცელებული ინფორმაციით, მთელი ღამის განმავლობაში მათ ბრაიანსკის, ბელგოროდის, კალუგისა და კურსკის ოლქების თავზე 45 უკრაინული დრონი ჩამოაგდეს.
“11 უპილოტო საფრენი აპარატი განადგურდა მოსკოვის ოლქის ტერიტორიაზე, 23 უპილოტო საფრენი აპარატი - ბრიანსკის ოლქის თავზე, 6 - ბელგოროდის ოლქის ტერიტორიაზე, 3 კალუგას რეგიონში და 2 კურსკის ოლქში“, - ნათქვამია განცხადებაში.
ახლახან კი გავრცელდა ინფორმაცია იმის შესახებ, რომ უკრაინელი სამხედროები როსტოვის რეგიონში, S-300 კომპლექსს დაესხნენ თავს.
S-300 საზენიტო სარაკეტო სისტემა როსტოვის ოლქის სოფელ ნოვოშახტინსკთან იყო განთავსებული. უკრაინის გენერალური შტაბის განცხადებაში აღნიშნულია, რომ S-300 სისტემებს რუსი სამხედროები უკრაინის მშვიდობიანი ქალაქების დასაბომბად იყენებდნენ.
იხილეთ ასევე: