ისრაელმა ღაზის სექტორიდან ექვსი მძევლის ცხედარი დაიბრუნა - სამხედრო ოპერაციის დეტალები
ისრაელის სამხედრო ძალებმა ღაზის სექტორიდან 6 მძევლის ცხედარი დაიბრუნა, რომლებიც 7 ოქტომბერს, ჰამასის ბოევიკებმა დაატყვევეს.
IDF-ის განცხადებაში ნათქვამია, რომ იაგევ ბუხსტაბის, ალექსანდრე დანციგის, აბრაამ მუნდერის, იორამ მეტცგერის, ნადავ პოპლველისა და ჩაიმ პერის ცხედრები ორშაბათს ხან იუნისის რაიონში აღმოაჩინეს.
დანციგისა და ბუხსტაბის დაღუპვა ივლისის დასაწყისში ისრაელის სამხედროებმა დაადასტურეს. არსებული ინფორმაციით ხუთივე მძევალი 2024 წლის დასაწყისში, ხან იუნისში მოკლეს. მათი გარდაცვალების გარემოებები უცნობია.
79 წლის აბრაამ მუნდერი ადრე ცოცხლად ითვლებოდა, მაგრამ სამშაბათს კიბუცში მცხოვრებმა ნირ ოზმა (სადაც ის 7 ოქტომბრის მოვლენებამდე ცხოვრობდა) მისი გარდაცვალება დაადასტურა.
როგორც BBC წერს, სამაშველო ოპერაცია ისრაელის თავდაცვის ძალებმა ისრაელის უსაფრთხოების სააგენტოსთან ერთად განახორციელეს. მძევლების ოჯახების ფორუმმა განაცხადა, რომ დარჩენილი 109 მძევლის დაბრუნება ღაზიდან "მხოლოდ მოლაპარაკებების გზით არის შესაძლებელი".
-
მოლაპარაკებები მიმდინარეობს
ცეცხლის შეწყვეტისა და მძევლების გათავისუფლების შესახებ მოლაპარაკებები, რომელიც გასულ კვირას დოჰაში დაიწყო, კაიროში გრძელდება.
ეგვიპტე, ყატარი და შეერთებული შტატები მოუწოდებენ ისრაელსა და ჰამასს ცეცხლი შეწყვიტონ, რის შემდეგაც მოხდება დარჩენილი მძევლების გათავისუფლება, ისრაელის ციხეებში მყოფი პალესტინელი პატიმრების სანაცვლოდ.
აშშ-ის სახელმწიფო მდივანმა ანტონი ბლინკენმა, რომელიც სამშაბათს კაიროში ჩავიდა, თქვა, რომ ისრაელმა მიიღო აშშ-ის შეთავაზება და მოუწოდა ჰამასს იგივე გააკეთოს.
ისრაელმა სამხედრო კამპანია ღაზაში 7 ოქტომბერს სამხრეთ ისრაელზე ჰამასის ბოევიკების თავდასხმის საპასუხოდ დაიწყო, რა დროსაც დაახლოებით 1200 ადამიანი დაიღუპა და 251 მძევლად აიყვანეს.
ჰამასის მიერ კონტროლირებადი ჯანდაცვის სამინისტროს მონაცემებით კი, მას შემდეგ ღაზაში 40 000-ზე მეტი ადამიანი დაიღუპა.
იხილეთ ასევე: