მაფიის ყოფილი ბოსის შვილის პოსტი, რომელმაც სიცილიური ქალაქი კორლეონე აღაშფოთა - " ეს არის ბოროტი თავდასხმა სახელმწიფოზე"
"კოზა ნოსტრას" ცნობილი ბოსის შვილმა სოციალურ მედიაში გამოქვეყნებული პოსტით სიცილიის ქალაქ კორლეონეში დიდი აღშფოთება გამოიწვია. გზავნილი დაგმეს, როგორც იტალიის სახელმწიფოს წინააღმდეგ "ბოროტი თავდასხმა".
ღვთისმშობლის მიძინების დღეს, იტალიის საყვარელ ეროვნულ დღესასწაულზე, რომელიც 15 აგვისტოს აღინიშნება, "სალვუჩიო" ჯუზეპე სალვატორე რინამ, სალვატორე "ტოტო" რინას შვილმა, სოციალურ მედიაში თავის მიმდევრებს "ბედნიერი დღესასწაული" უსურვა მისამართიდან: "ვია სკორსონეზეს ქუჩა, 24, კორლეონე, იტალია".
ეს მისამართი წლების განმავლობაში რინას ოჯახის საცხოვრებელი იყო, მაგრამ 2018 წელს ქუჩის სახელი შეიცვალა და ვია ტერანოვა გახდა, რაც მაფიის წინააღმდეგ მებრძოლი მოსამართლის, ჩეზარე ტერანოვასთვის პატივის მიგების ნიშნად მოხდა. ტერანოვა კორლეონეს მაფიის ბოსის, ლუჩიანო ლიჯიოს მიერ ორგანიზებული ჩასაფრების შედეგად, 1979 წელს მოკლეს.
უოლტერ რა, რომელიც ივნისში კორლეონეს მერად აირჩიეს, ამ პოსტს "ლაჩრულად" მოიხსენიებს და ამტკიცებს, რომ ქალაქმა თავისი ბნელი ისტორია დამარცხა და დაშინებას არ დაემორჩილება. "ჩვენ მათ ამის უფლებას არ მივცემთ," - უთხრა მან იტალიურ მედიას, - "ჩვენ ეს გვერდი გადავშალეთ, ვერავინ გვაიძულებს უკან დაბრუნებას."
სალვუჩიო რინამ მოგვიანებით პოსტი შეცვალა და ამოიღო მინიშნება "ვია სკორსონეზე".
ტოტო რინა 2017 წელს, ციხეში გარდაიცვალა. მეტსახელად "მხეცი", სავარაუდოდ, 150-ზე მეტი მკვლელობის ბრძანების გამცემია, მათ შორის - 3 წლის ბიჭის მკვლელობის, რომელიც მჟავაში დაადნეს. მან ასევე გასცა ბრძანება ანტიმაფიოზური მოსამართლეების, ჯოვანი ფალკონესა და პაოლო ბორსელინოს მკვლელობაზე, 1992 წელს.
მისი მესამე შვილი, სალვუჩიო, კორლეონეში საცხოვრებლად 2023 წელს დაბრუნდა, მას შემდეგ, რაც თითქმის ცხრა წელი გაატარა ციხეში მაფიასთან კავშირის, ფულის გათეთრებისა და გამოძალვისთვის, შემდეგ ვენეტოსა და აბრუცოს შორის გადაადგილდებოდა, სადაც ის სოციალური სამსახურების სქემაში იყო ჩართული. კორლეონეს ყოფილმა ადმინისტრაციამ მისი გაძევება სცადა, რათა ქალაქი "რეპუტაციული ზიანისგან" დაეცვა.
ქალაქის ამჟამინდელმა ლიდერებმა სალვუჩიო რინას სოციალური მედიის პოსტთან დაკავშირებით განაცხადეს:
"მტკიცედ ვემიჯნებით ასეთ განცხადებებს და ვგმობთ ასეთ თავხედობას, რომელიც არის ბოროტი თავდასხმა სახელმწიფოსა და ინსტიტუტების წინააღმდეგ. რინა უმცროსის გამონათქვამები მხოლოდ აძლიერებს კორლეონეზე უარყოფით და დამახინჯებულ ხედვას, ჩრდილავს რა იმ ძალისხმევას, რასაც საზოგადოება ყოველდღიურად ახორციელებს, რათა თავი დააღწიოს მაფიასა და დანაშაულთან დაკავშირებულ რეპუტაციას. კორლეონე არ არის მაფია. კორლეონე არის ისტორია, კულტურა, თავისუფლება, მაგრამ უპირველეს ყოვლისა, კორლეონე კანონიერებაა, ყველა ის მახასიათებელი, რომელსაც ასეთი საეჭვო პერსონაჟები ვერასდროს შეარყევენ".
გავრცელებული ინფორმაციით, სალვუჩიო რინამ ივნისში ესპანეთში, თავის ესპანელ პარტნიორზე იქორწინა და ქორწილის შემდგომი წვეულება, საიდუმლოდ კორლეონეს რესტორანში გამართა, რომელიც 200 სტუმარს იტევს. 2016 წელს მან დაწერა საკამათო წიგნი, "რინას ოჯახური ცხოვრება", რომლის გაყიდვაზეც წიგნის ბევრმა მაღაზიამ უარი თქვა.
სალვუჩიოს გარდა, ტოტო რინას სამი შვილი ჰყავდა: მარია კონჩეტა, ჯოვანი ფრანჩესკო და ყველაზე უმცროსი - ლუჩია. ჯოვანი რინას, ასევე "კოზა ნოსტრას" მაფიოზს, 1996 წელს სამუდამო პატიმრობა მიესაჯა. 2019 წელს ლუჩია რინამ პარიზში, ტრიუმფალური თაღის მახლობლად რესტორანი გახსნა, სახელწოდებით, "კორლეონე", მაგრამ ერთი წლის შემდეგ დახურა.