შეიარაღებული რამზან კადიროვი ილონ მასკს სტუმრად ეპატიჟება და Cybertrack-ის საომარ ზონაში გაგზავნას გეგმავს - “დარწმუნებული ვარ, ეს მხეცი დიდ სარგებელს მოუტანს ჩვენს ჯარებს"

ჩეჩნეთის მეთაურმა Tesla-ს უახლესი ავტომობილის, Cybertrack-ის ხელში ჩაგდება მოახერხა და მისით ისეა აღფრთოვანებული, რომ ილონ მასკს სტუმრად იწვევს.

რამზან კადიროვმა სოციალურ ქსელში ვიდეო გამოაქვეყნა, სადაც ჩანს, როგორ მართავს ის Cybertrack-ს ავტომატით შეიარაღებული. ვიდეოში კადიროვი პოპულარულ ელექტრო მანქანას აქებს და ამბობს, რომ ის უდავოდ ერთ-ერთი საუკეთესო მანქანაა მსოფლიოში.

როგორც ვიგებთ, Cybertruck მალე უკრაინისა და რუსეთის ომის ფრონტის ხაზზე გაემგზავრება, როგორც კრემლისთვის გადაცემული საჩუქარი:

"მას ტყუილად არ უწოდებენ კიბერმხეცს. დარწმუნებული ვარ, რომ ეს მხეცი დიდ სარგებელს მოუტანს ჩვენს ჯარებს", - განაცხადა კადიროვმა.

გამოქვეყნებულ ვიდეოში ჩეჩენმა მხედართმთავარმა ასევე შეაქო მასკი. მას "თანამედროვეობის ყველაზე ძლიერი გენიოსი" უწოდა და ჩეჩნეთში დაპატიჟა, თუმცა დათანხმდება თუ არა მილიარდერი ამ შეთავაზებას, ჯერჯერობით უცნობია.

წყარო: nypost

მოამზადა: ანა სიბოშვილმა