ცხელი ღამე ყირიმში, პუტინის ტაქტიკური ცვლილება კურსკის რეგიონში და უკრაინის წინსვლა - რა მდგომარეობაა 16 აგვისტოს მონაცემებით?
უკრიანის შეიარაღებული ძალები რუსეთის ტერიტორიაზე, კურსკის ოლქში შეჭრის შემდეგ წინსვლას განაგრძობენ. ჯერ კიდევ გუშინ ცნობილი გახდა, რომ 6 აგვისტოს, კურსკის რაიონში შეტევის დაწყებიდან, 9 დღის შემდეგ, უკრაინელმა სამხედროებმა 82 დასახლება აიღეს და 1150 კვადრატულ კილომეტრ ტერიტორიას აკონტროლებენ.
უკრაინის შეიარაღებული ძალების მთავარსარდალმა ალექსანდრე სირსკიმ კი განაცხადა, რომ უკრაინამ კურსკის ოლქის კონტროლირებად ტერიტორიაზე პირველი კომენდატურა - სამხედრო სამეთაურო ოფისი შექმნა. მისი თქმით, კომენდატურის უფროსად გენერალ-მაიორი ედუარდ მოსკალევი დაინიშნა.
რა მდგომარეობაა 16 აგვისტოს მონაცემებით?
-
რუსულმა “შაჰედმა“ კიევის საჰაერო სივრცე გადაკვეთა
ტელეგრამარხებზე გავრცელებული ინფორმაციით, გუშინ, რუსულმა “შაჰედმა“ უკრაინის დედაქალაქის, კიევის საჰაერო სივრცე გადაკვეთა, რაც ამ ბოლო დროს იშვიათი მოვლენაა.
უპილოტო საფრენი აპარატი დასავლეთით, ბუჩასა და გოსტომელისკენ გაფრინდა.
-
ღამით სევასტოპოლს უკრაინულმა დრონებმა შეუტიეს
რუსეთის მიერ ანექსირებულ ყირიმში, სევასტოპოლში, საჰაერო თავდაცვამ უკრაინული თვითმფრინავების იერიში მოიგერია.
ამის შესახებ რუსეთის მიერ დანიშნულმა გუბერნატორმა მიხაილ რაზვოჟაევმა განაცხადა.
-
ბელგოროდის ოლქში, საგანგებო მდგომარეობა ფედერალურ დონეზე გამოცხადდა
ამის შესახებ რუსეთის საგანგებო სიტუაციების სამინისტროს ხელმძღვანელმა ალექსანდრე კურენკოვმა სახანძრო უსაფრთხოების უზრუნველყოფისა და საგანგებო სიტუაციების პრევენციისა და ლიკვიდაციის სამთავრობო კომისიის რიგგარეშე სხდომაზე განაცხადა.
“გთავაზობთ, ბელგოროდის ოლქის ტერიტორიაზე შექმნილ საგანგებო მდგომარეობას ფედერალური დონის საგანგებო მდგომარეობის სტატუსი მივანიჭოთ და რეაგირების ფედერალური დონე დავაწესოთ“, - განაცხადა ალექსანდრე კურენკოვმა.
მისივე თქმით, რეგიონში შექმნილი ვითარება კვლავ მძიმე და დაძაბულია.
-
რუსეთის საჰაერო თავდაცვამ მოიგერია თავდასხმის სერია ყირიმის ხიდზე და საბორნე გადასასვლელზე
რუსეთის საჰაერო თავდაცვამ ბოლო ერთი საათი ყირიმის ხიდზე და რუსეთსა და ანექსირებულ ყირიმს შორის საბორნე გადასასვლელზე თავდასხმის მოგერიებაში გაატარა, რომელიც, სავარაუდოდ, სარაკეტო თავდასხმას წარმოადგენდა.
რუსული სადამკვირვებლო არხი Prigranichye ირწმუნება, რომ ყირიმის ხიდზე რვა რაკეტა ჩამოაგდეს.
კიდევ ერთი რუსული არხი, Radar Crimea, ავრცელებს ინფორმაციას ქერჩზე სარაკეტო თავდასხმის შესახებ, შემდეგ კი გამოაცხადა, რომ საჰაერო თავდაცვის ცეცხლი უკვე ჩაქრა.
ოფიციალური რუსული წყაროები იტყობინებიან ქერჩში საჰაერო თავდასხმისა და ყირიმის ხიდის დაკეტვის შესახებ.
-
CNN-ის ინფორმაციით, რუსეთმა კურსკის რეგიონში რამდენიმე ათასი ჯარისკაცი გაგზავნა, თუმცა ფრონტიდან სერიოზული ძალების გაყვანას არ გეგმავს
“რუსეთმა კურსკის რეგიონში, უკრაინის შეტევის მოსაგერიებლად რამდენიმე ბრიგადა განალაგა, მაგრამ ჯერ არ გამოუყვანია სერიოზული ძალები უკრაინის ფრონტიდან“,- წერს CNN.
კიდევ ერთმა მაღალჩინოსანმა, რომელმაც ანონიმურად დარჩენა ისურვა, მედიასთან განაცხადა, რომ აშშ-ის დაზვერვის თანახმად, რუსეთმა, უკრაინის ქვედანაყოფების გარდა, კურსკის რეგიონში გაგზავნა პერსონალი ლენინგრადის სამხედრო ოლქიდან და კალინინგრადიდან.
-
ღამით ყირიმთან ხუთი უპილოტო და ორი საზღვაო დრონი განადგურდა - რუსეთის თავდაცვის სამინისტრო
რუსეთის თავდაცვის სამინისტრო აცხადებს, რომ ხუთი უკრაინული დრონი და ორი უპილოტო ნავი განადგურდა ღამით ყირიმის სანაპიროსთან ზღვაში.
სამინისტროს ჯერ არაფერი უთქვამს ყირიმის ხიდისა და საბორნე გადასასვლელის მიდამოში უკრაინული სარაკეტო დარტყმის შესახებ.
-
ვითარება შეაფასა უკრაინის პრეზიდენტმა, ვოლოდიმირ ზელენსკიმ
მან უმაღლეს რადას მოუწოდა, შეიკრიბოს და მხარი დაუჭიროს “უკრაინისთვის თავდაცვით საკანონმდებლო პაკეტს”, რომელიც მოიცავს კურსკის ოლქში უკრაინელი სამხედროების სტატუსის განსაზღვრას, უცხოელი მებრძოლებისთვის უკრაინის მოქალაქეობის მიცემას და სხვა საკითხებს.
“პირველი - მკაფიოდ გარანტირებული უნდა იყოს სწორედ საკანონმდებლო დონეზე, რომ ჩვენი მებრძოლები, რომლებიც, მაგალითად, კურსკის ოპერაციაში მონაწილეობენ, და აგრესორი სახელმწიფოს ტერიტორიებზე ჩვენს სხვა ქმედებებში მიიღებენ მონაწილეობას, მიიღებენ აბსოლუტურად ყველა გადასახადსა და პრეფერენციას, რომელიც ფრონტისთვისაა განკუთვნილი. ეს სწორედ კანონით უნდა გაკეთდეს, რათა ჩვენი ხალხი დარწმუნებული იყოს, რომ სახელმწიფო იმუშავებს ისე, როგორც საჭიროა.
მეორე - ყოველი მებრძოლი, რომელიც უკრაინის სახელმწიფოს იცავს, ჩვენს ხალხს იცავს, ჩვენს დამოუკიდებლობას იცავს, იმსახურებს აღიარებასა და მაქსიმალურ მხარდაჭერას. ეს ეხება, კერძოდ, ჩვენს იმ მებრძოლებს - უკრაინელ ლეგიონერებს, - რომლებსაც ახლა სხვა სახელმწიფოების მოქალაქეობა აქვთ, მაგრამ უკრაინის ჯერ არა. ისინი იმსახურებენ იყვნენ ჩვენი მოქალაქეები, უკრაინის მოქალაქეები, შესაბამის პატივისცემას უნდა იღებდნენ უკრაინის სახელმწიფოსგან. ასევე სამართლიანია ამის გავრცელება ნათესავებზე, ჩვენი გმირების ნათესავებზე”, - განაცხადა ზელენსკიმ.
უკრაინის შეიარაღებული ძალების შეტევითი ოპერაცია კურსკის ოლქში 6 აგვისტოს დაიწყო. ბრძოლები მიმდინარეობს კორენევსკის, სუჯანსკისა და ბელოვსკის რაიონებში. კურსკის ოლქის გუბერნატორის მოვალეობის შემსრულებელმა ალექსეი სმირნოვმა 12 აგვისტოს განაცხადა, რომ უკრაინის შეიარაღებული ძალები მის რეგიონში 28 დასახლებას აკონტროლებენ. უკრაინის შეიარაღებული ძალების ინფორმაციით, კი მათ 82 დასახლება აიღეს.
იხილეთ ასევე:
- ომი რუსეთის ტერიტორიაზე გრძელდება: უკრაინის მასირებული შეტევა 2 სტრატეგიულ აეროდრომზე და საგანგებო მდგომარეობა ბელგოროდში - წუხანდელი ღამის ქრონიკა
- 200 000-ზე მეტი ევაკუირებული, განადგურებული ინფრასტრუქტურა და გამქრალი რუსული დროშები - ფოტოები ქალაქებიდან, რომლის ნაწილს უკვე უკრაინა აკონტროლებს