გიგა ბოკერიამ და თამარ ჩერგოლეიშვილმა ახალი პარტია "ფედერალისტები“ წარადგინეს და 27 სექტემბერს აქცია დააანონსეს
"ევროპული საქართველოდან“ წასული პოლიტიკოსები, გიგა ბოკერია და თამარ ჩერგოლეიშვილი ახალ პარტიას აფუძნებენ.
პარტია "ფედერალისტების“ პრეზენტაცია თამარ ჩერგოლეიშვილმა გახსნა, რომელმაც აუდიტორიას პარტიის ახალი ლოგო წარუდგინა და სამომავლო გეგმებზე ესაუბრა.
ჩერგოლეიშვილმა პარტიის სახელწოდების შერჩევის მიზეზზეც ისაუბრა და განმარტა, რომ არჩევნებთან დაკავშირებულ შეკითხვებს პასუხები სექტემბერში გაეცემა. ასევე, მისივე განცხადებით, პარტიის დამფუძნებელი ყრილობაც სექტემბერში ჩატარდება.
"ზუსტად ვიცით, რა უნდა გავაკეთოთ, ზუსტად ვიცით, რამ იმუშავა იქ, რამაც თქვენი ყურადღება ჩვენკენ მოაპყრო და ზუსტად ვიცით, ეს ყურადღება როგორ გავზარდოთ და გავაფართოოთ.
რაც შეეხება პარტიის სახელს, რატომ "ფედერალისტები“ - ორი დღის წინ ზუგდიდში ორი ბავშვი დაიწვა და ეს ერთდღიანი ფეისბუკ-მოთქმა ვნახეთ და ეს ახასიათებს, ზოგადად, სოციალურ მედიას, რომ რაღაც დიდი უბედურება მოხდება, ერთი დღე ხალხი ინერვიულებს და მერე ისევ რაღაც დიდი უბედურება ხდება. ამ ყველაფერზე ერთი პასუხი არსებობს სინამდვილეში - ბუნებრივია, ტრაგედიებს თავიდან ვერავინ აიცილებს, ტრაგედიები ყოველთვის მოხდება, მაგრამ იმისთვის, რომ ადამიანის სიცოცხლეს ფასი მიეცეს, იმისთვის, რომ ადამიანებმა შეძლონ თავისი სიცოცხლის უფლებისკენ, თავისუფლებისკენ, ბედნიერებისკენ სწრაფვის რეალიზება, საჭიროა, ეს თავს მოხვეული თავკომბალა სახელმწიფო დაიშალოს და აეწყოს ახალი სახელმწიფო, ახალი რესპუბლიკა, რომელიც დაფუძნებული იქნება ძლიერ მოქალაქეებზე. ამას ემსახურებოდა ის პრაიმერიზიც. ეს არის სწორი სისტემა, როგორც უნდა ვიმუშაოთ და სწორედ ამიტომ, ფედერალიზმი. ფედერალიზმი არ არის სახელმწიფო მოწყობა, ეს არის სისტემა, რომელიც ძალის ისეთ გაწონასწორებას წარმოქმნის, სადაც ადამიანის სიცოცხლეს, მის უნარებს, მის შესაძლებლობებს განსაკუთრებული ფასი ედება.
არჩევნების გარშემო დასმულ კითხვებს პასუხებს სექტემბერში გავცემთ. მინდა გთხოვოთ, თუ კი თქვენი ნდობა გვაქვს, ეს ერთი თვეც მინდა გთხოვოთ ნდობის გამოჩენა. ვიმოქმედებთ, პირველ რიგში, თქვენი ინტერესებიდან გამომდინარე და შემდეგ, ქვეყნის ინტერესების შესაბამისად, რაც გულისხმობს რუსული რეჟიმის შეცვლას“, - განაცხადა თამარ ჩერგოლეიშვილმა.ა.
როგორც თამარ ჩერგოლეიშვილმა აღნიშნა, ქუჩის აქტივობის გარეშე ძნელად წარმოსადგენია ხელისუფლების დამარცხება ისეთი გარანტიებით, რომ მან ამ გამარჯვების მოპარვა ვერ შეძლოს.
"მიგვაჩნია, რომ დღეს პროცესი როგორც მიდის, ეს პროცესი არ ეყოფა რეჟიმის დამარცხებას. მე მგონია, რომ რაღაც მეტია საჭირო იმისათვის, რომ რეჟიმი გარანტირებულად დამარცხდეს. ჩვენ გვჭირდება, რომ მანამდე მივხვდეთ, რომ რეჟიმი დამარცხებულია. ქართველ ხალხს არჩევნებში სანამ შევა, მანამდე უნდა ჰქონდეს განცდა, რომ რეჟიმს ამარცხებს. ძალიან მნიშვნელოვანია, რომ ქუჩაში აქტიურობა არსებობდეს. ჩვენ თუ კვლევებს ავიღებთ, მთავარი პრობლემა არის ის, რომ "ქოცები“ უფრო ცოტანი არიან, მაგრამ მოტივირებულები არიან, ოპოზიციის ამომრჩეველი ასე არ გრძნობს თავს, შედარებით უფრო დაბნეულია. საჭიროა ისეთი მორალური უპირატესობის მოპოვება ქუჩაში, როგორიც გვქონდა აპრილსა და მაისში. ჩვენ რაც არ უნდა მოვინდომოთ, პოლიტიკოსები არ გეგმავენ ასეთ აქციებს, ასეთი აქციები თავისით ეწყობა, როგორც წესი, მაგრამ ჩვენ რაც შეგვიძლია უნდა გავაკეთოთ იმისათვის, რომ ქუჩას თუ აქვს რესურსი ერთგვარი აფეთქების, ეს მოხდეს.
სწორედ ამიტომ 27 სექტემბერს, სოხუმის დაცემის დღეს, ჩვენ ვნიშნავთ აქციას. მთელი ეს პერიოდი 27 სექტემბრამდე მოვამზადებთ ამ აქციას. ვიდრე გადაწყვეტილებას მივიღებთ იმასთან დაკავშირებით, არჩევნებში რას ვშვრებით, ჩვენი კამპანია იქნება ზუსტად ეს. ეს საუკეთესოდ პასუხობს ხელისუფლების ანტიდასავლურ პროპაგანდას და ამასთან, ქუჩაში ხალხის აქტიურობის გარეშე ძნელად წარმოგვიდგენია ბიძინა ივანიშვილის დამარცხება ისეთი გარანტიებით, რომ მან ამ გამარჯვების მოპარვა ვერ შეძლოს“, - განაცხადა თამარ ჩერგოლეიშვილმა.