ინდოეთის ერთ-ერთ საავადმყოფოში ექიმი ქალი გააუპატიურეს და მოკლეს: უმძიმესი დანაშაულის შემდეგ ქვეყანაში სამედიცინო სფეროს მუშაკები გაიფიცნენ
ინდოეთის ერთ-ერთ უძველეს საავადმყოფოში, 9 აგვისტოს, დილით, 31 წლის სტაჟიორი ექიმი მძიმე სამუშაო დღის შემდეგ სემინარების ოთახში დასაძინებლად წავიდა. ამის შემდეგ ის ცოცხალი აღარავის უნახავს...
მეორე დილით, მისმა კოლეგებმა მისი ნახევრად შიშველი სხეული აღმოაჩინეს, რომელსაც მრავალი დაზიანება აღენიშნებოდა. პოლიციამ მოგვიანებით საავადმყოფოს მოხალისე მუშაკი დააკავა. საქმე გაუპატიურებისა და მკვლელობის ბრალდებებით აღიძრა.
კოლკატაში და მთელ დასავლეთ ბენგალში ათი ათასობით ქალი დღეს შუაღამისას, "ღამის დაბრუნების" მარშში მიიღებს მონაწილეობას. მათი მოთხოვნა "თავისუფლებასა და შიშის გარეშე ცხოვრების უფლება" იქნება. საპროტესტო აქცია ინდოეთის დამოუკიდებლობის დღის წინა დღეს ტარდება. როგორც ქალაქში, ისე მთელ ინდოეთში, ექიმები გაიფიცნენ და ისინი ჯანდაცვის მუშაკთა დასაცავად მკაცრ ფედერალურ კანონს მოითხოვენ.
ტრაგიკულმა ინციდენტმა ქვეყანაში ჯანდაცვის მუშაკთა მიმართ ძალადობის შემთხვევებს კვლავ მიაპყრო ყურადღება.
ქალები ინდოეთის ექიმების დაახლოებით 30%-სა და საექთნო პერსონალის 80%-ს შეადგენენ. ისინი გაცილებით დიდი საფრთხის ქვეშ არიან, ვიდრე მათი მამაკაცი კოლეგები. ოფიციალური მონაცემები 2022 წელს ქალთა მიმართ დანაშაულის შემაშფოთებელ, 4%-იან ზრდას ცხადყოფს, ამ სახის დანაშაულის 20%-ზე მეტი კი გაუპატიურებასა და თავდასხმას მოიცავს. გასულ კვირას კოლკატას საავადმყოფოში მომხდარმა დანაშაულმა უსაფრთხოების საგანგაშო რისკები გამოააშკარავა, რომლებსაც ქალი თანამშრომლები ინდოეთის მრავალ სახელმწიფო სამედიცინო დაწესებულებაში აწყდებიან.
აღნიშნულ საავადმყოფოში, რომელიც ყოველდღიურად 3 500-ზე მეტ პაციენტს ემსახურება, გადატვირთულ სტაჟიორ ექიმებს, რომელთაგან ზოგიერთი უწყვეტად, 36 საათამდე მუშაობდა, არ ჰქონდათ დასასვენებელი ოთახები, რაც აიძულებდათ, მესამე სართულზე, სემინარების ოთახში მოესვენათ.
გამოძიების თანახმად, დაკავებულ ბრალდებულ მოხალისეს პრობლემური წარსულით, კლინიკაში შესვლის შეუზღუდავი უფლება ჰქონდა. პოლიცია ამტკიცებს, რომ მოხალისეზე არანაირი ბიოგრაფიული შემოწმება არ ჩატარებულა.
"საავადმყოფო ყოველთვის ჩვენი უპირველესი სახლი იყო; შინ მხოლოდ დასასვენებლად მივდივართ. ვერასდროს წარმოვიდგენდით, რომ ის ასეთი საშიში შეიძლებოდა ყოფილიყო. ამ ინციდენტის შემდეგ, თავზარდაცემულები ვართ", - ამბობს კოლკატას ეროვნული სამედიცინო კოლეჯის უმცროსი ექიმი, მადჰუპარნა ნანდი.
საავადმყოფოში, სადაც ის მეან-გინეკოლოგიის რეზიდენტია, ქალი ექიმებისთვის დასასვენებელი ოთახები და ცალკე ტუალეტები გამოყოფილი არ არის.
"პაციენტების ან ექთნების ტუალეტებს ვიყენებ, თუ ამის ნებას დამრთავენ. როდესაც გვიან ვმუშაობ, ზოგჯერ პალატაში, პაციენტის ცარიელ საწოლზე ან ვიწრო მოსაცდელ ოთახში მძინავს", - აღნიშნა დოქტორმა ნანდიმ BBC-სთან საუბრის დროს.
მისი თქმით, 2021 წელს, როდესაც კოვიდ პანდემია პიკში იყო, ღამით მის ოთახში რამდენიმე მამაკაცი შევარდა, ის შეხებით გააღვიძეს და მოითხოვდნენ, რომ ერთ-ერთი პაციენტი ენახათ.
"ამ ინციდენტით შოკირებული ვიყავი, მაგრამ ვერასდროს წარმოვიდგენდით, რომ საქმე იქამდე მივიდოდა, რომ შეიძლებოდა, საავადმყოფოში ექიმი გაეუპატიურებინათ ან მოეკლათ", - აღნიშნავს დოქტორი ნანდი.
ის, რაც პარასკევს მოხდა, ერთადერთი შემთხვევა არ ყოფილა. ყველაზე შოკისმომგვრელი მუმბაის ცნობილი საავადმყოფოს ექთნის, არუნა შანბაუგის შემთხვევა იყო, რომელიც მუდმივ ვეგეტატიურ მდგომარეობაში დარჩა მას შემდეგ, რაც 1973 წელს პალატის მომვლელმა გააუპატიურა და მისი დახრჩობა სცადა. შანბაუგი 2015 წელს გარდაიცვალა, 42 წლის განმავლობაში მძიმე ტვინის დაზიანებითა და პარალიზებულ მდგომარეობაში ყოფნის შემდეგ. უფრო ახლახან, 2023 წელს, კერალაში, 23 წლის სტაჟიორი, ვანდანა დასი ნასვამმა პაციენტმა ქირურგიული მაკრატლით სასიკვდილოდ დაჭრა.
ინდოეთს ჯანდაცვის მუშაკთა დასაცავად მკაცრი ფედერალური კანონი არ აქვს. ზოგიერთმა შტატმა, როგორიც ჰარიანაა, სახელმწიფო საავადმყოფოებში უსაფრთხოების გასაძლიერებლად კერძო დაცვის თანამშრომლები განათავსა. 2022 წელს ფედერალურმა მთავრობამ შტატებს მოუწოდა, საავადმყოფოებში გაწვრთნილი უსაფრთხოების ძალები განეთავსებინათ, დაემონტაჟებინათ კამერები, შეექმნათ სწრაფი რეაგირების ჯგუფები, "არასასურველი პირებისთვის" შესვლა შეეზღუდათ და დამნაშავეთა წინააღმდეგ საჩივრები შეეტანათ. თუმცა, აქედან ბევრი რამ არ განხორციელებულა.
გაფიცული ექიმებიც იმედგადაწურულნი არიან.
"არაფერი შეიცვლება... მოლოდინი იქნება, რომ ექიმებმა დღე და ღამე უნდა იმუშაონ და შევიწროვება ისე აიტანონ, თითქოს ეს ნორმაა", - ამბობს ერთ-ერთი მათგანი.