ირანმა ისრაელს პირობები წაუყენა - რა შემთხვევაში განახორციელებს ქვეყანა პირდაპირ თავდასხმას: სამმა მაღალჩინოსანმა დეტალები გათქვა
“მხოლოდ ღაზაში ცეცხლის შეწყვეტას შეუძლია ისრაელის მიმართ, ირანის შურისძიების გადადება“, - ამის შესახებ ინფორმაციას გამოცემა Reuters-ი სამ ირანელ ოფიციალურ პირზე დაყრდნობით ავრცელებს.
“ერთ-ერთმა წყარომ, ირანის უშიშროების მაღალჩინოსანმა, თქვა, რომ ირანი, მოკავშირეებთან ერთად, როგორიცაა ჰეზბოლა, იმ შემთხვევაში დაიწყებს პირდაპირ თავდასხმას, თუ ღაზაზე მოლაპარაკებები წარუმატებელი იქნება ან ცხადი გახდება, რომ ისრაელი მოლაპარაკებებს აჭიანურებს.
წყაროებს არ უთქვამთ, რამდენ ხანს დაუშვებს ირანი მოლაპარაკებების პროცესს“, - წერს მედია.
ისრაელმა და ჰამასმა ბოლო თვეების განმავლობაში მოლაპარაკებების რამდენიმე რაუნდი გამართეს.
ისრაელში კი ბევრი დამკვირვებელი თვლის, რომ მათი რეაგირება გარდაუვალია მას შემდეგ, რაც უზენაესმა ლიდერმა აიათოლა ალი ხამენეიმ განაცხადა, რომ ირანი ისრაელს "ჰამასის" ლიდერის, ისმაილ ჰანიეს მკვლელობისთვის "მკაცრად დასჯის".
ცოტა ხნის წინ, ირანის ახალმა პრეზიდენტმა მასუდ პეზეშკიანმა უზენაეს ლიდერს თავის შეკავება სთხოვა და განაცხადა, რომ ირანის მხრიდან, ისრაელზე თავდასხმა წარმოუდგენელ შედეგებს მოუტანს მსოფლიოს.
შეგახსენებთ, მიუხედავად იმისა, რომ თეირანში “ჰამასის“ ლიდერის, ისმაილ ჰანიეს მკვლელობის შესახებ ისრაელს კომენტარი არ გაუკეთებია, ირანი და “ჰამასი“ ჰანიეს მკვლელობაში ისრაელს ადანაშაულებენ და “ჰეზბოლასთან“ ერთად შურისძიების პირობას დებენ.
ირანის საგარეო საქმეთა მინისტრის მოვალეობის შემსრულებელი კი აცხადებდა, რომ "სიონისტები იმ მდგომარეობაში არ არიან, რომ ირანის ისლამური რესპუბლიკის წინააღმდეგ ომი დაიწყონ. მათ ამისთვის არც შესაძლებლობა აქვთ და არც ძალა“, - განაცხადა ალი ბაგერმა.
იხილეთ ასევე: