თავდასხმა რუსეთის ტერიტორიაზე ტანკების, არტილერიისა და კამიკაძე-დრონების გამოყენებით - რა ხდება კურსკში, სადაც მეორე დღეა ბრძოლების შესახებ იუწყებიან?

6 აგვისტოს ღამით კურსკის რეგიონს უკრაინული დრონები დაესხნენ თავს - რეგიონის გუბერნატორის მოვალეობის შემსრულებელმა ალექსეი სმირნოვმა განაცხადა, რომ 26 თვითმფრინავის ტიპის დრონი ჩამოაგდეს. იმავე ღამით, სუჯას რეგიონულ ცენტრს, რომელიც რუსეთ-უკრაინის საზღვრიდან 10 კილომეტრში მდებარეობს, ცეცხლი გაუხსნეს. დილით გავრცელდა ცნობები სასაზღვრო ზონაში ბრძოლების შესახებ.

სამშაბათს, ომის მომხრე "ტელეგრამარხებმა" გაავრცელეს ინფორმაცია, რომ უკრაინის შეიარაღებული ძალების ქვედანაყოფები სუჯას ჩრდილო-დასავლეთით წინ მიიწევდნენ. სოციალურ ქსელში კი რეგიონული ცენტრის დაბომბვის ამსახველი ვიდეომასალა გამოჩნდა. ადგილობრივი ადმინისტრაციის ცნობით, დაშავებულია 11 ადამიანი, დაიღუპა 28.

ოთხშაბათს ღამით ქალაქი სუჯა კვლავ ცეცხლის ქვეშ მოექცა. აფეთქებები დაფიქსირდა ქალაქ კურჩატოვშიც, სადაც კურსკის ატომური ელექტროსადგური მდებარეობს. სავარაუდოდ, იქ საჰაერო თავდაცვის სისტემები მოქმედებდა.

• რას ამბობს რუსეთი?

რუსეთის თავდაცვის სამინისტრომ სამშაბათს, 15:05 საათზე, პირველი კომენტარი გააკეთა: ”დღეს, მოსკოვის დროით დილის 8:00 საათიდან, უკრაინის შეიარაღებული ძალები 11 ტანკისა და 20-ზე მეტი ჯავშანტექნიკის გამოყენებით თავს დაესხნენ რუსეთის ფედერაციის სასაზღვრო ქვედანაყოფების პოზიციებს კურსკის ოლქის ნიკოლაევო-დარიინოს და ოლეშნიას დასახლებების რაიონებში. მისი [მტრის] რეზერვები დამარცხდა ბასოვკას, ჟურავკას, იუნაკოვკას, ბელოვოდის, კიანიცას, კორჩაკოვკას, ნოვაია სიჩის, პავლოვკას, გოროდიშჩეს, სუმის რეგიონის დასახლებებში", - ნათქვამია განცხადებაში.

სამშაბათს საღამოს თავდაცვის სამინისტრომ ახალი განცხადება გააკეთა - უკრაინულმა დივერსიულმა და სადაზვერვო ჯგუფმა, რომელიც სავარაუდოდ კურსკის ოლქის ტერიტორიაზე შევიდა, ზარალი განიცადა და "უკან დაიხია". ეს შეტყობინება მალევე წაიშალა. "მტერი კვლავ რჩება კურსკის რეგიონის ტერიტორიაზე“, წერს ბლოგერი რომან ალეხინი.

• რა განაცახდა პუტინმა?

რუსეთის პრეზიდენტის, ვლადიმერ პუტინის განცხადებით, კურსკის ოლქში განვითარებული მოვლენები უკრაინის მხრიდან “მასშტაბური პროვოკაციაა.”

ამის შესახებ რუსეთის პრეზიდენტმა ვლადიმირ პუტინმა მთავრობის წევრებთან გამართულ სხდომაზე განაცხადა.

კერძოდ, პუტინის თქმით, კურსკის ოლქში განვითარებული მოვლენები “მასშტაბური პროვოკაციაა” უკრაინის მხრიდან და ოლქში “განურჩეველი სროლა” მიდის იარაღის სხვადასხვა სახეობიდან, მათ შორის სარაკეტო იარაღიდან. “ჩვენი სხდომის შემდეგ მექნება შეხვედრა ძალოვანი სტრუქტურების ხელმძღვანელებთან, თავდაცვის სამინისტროსთან, გენერალურ შტაბთან, “ეფესბესთან”, ვგულისხმობ უშიშროების ფედერალური სამსახურის საქმიანობის სასაზღვრო მიმართულებას, და კოლეგების მორიგ ანგარიშს მოვისმენ იმის თაობაზე, თუ რა ხდება კურსკის ოლქში”, - განაცხადა პუტინმა.

• რა არის ცნობილი დანაკარგების შესახებ

რუსულმა სამხედრო არხებმა გაავრცელეს რამდენიმე განადგურებული უკრაინული ჯავშანტექნიკის ვიდეო, ასევე კადრები, რომლებიც, სავარაუდოდ, სუმის რეგიონში უკრაინული ბუკის საჰაერო თავდაცვის სისტემის განადგურებას ასახავს.

რუსეთის სამხედროების ცნობით, უკრაინის შეიარაღებულმა ძალებმა კურსკის რეგიონში დაკარგეს 50 ჯავშანმანქანა, მათ შორის შვიდი ტანკი, რვა ჯავშანტრანსპორტიორი, სამი ქვეითი საბრძოლო მანქანა, ორი Buk M1 საჰაერო თავდაცვის სისტემა და ა.შ. სამინისტრო ასევე აცხადებს, რომ უკრაინელმა სამხედროებმა ბოლო 24 საათის განმავლობაში მძიმე საკადრო დანაკარგები განიცადეს.

"უკრაინის შეიარაღებული ძალების ქვედანაყოფების განადგურების ოპერაცია გრძელდება", - ნათქვამია განცხადებაში.

რუსეთმა დაკარგა კა-52 ვერტმფრენი, ასევე დაიღუპა მათი ერთ-ერთი მეთაური.

უკრაინის მხარე თავს იკავებს ამ სპეცოპერაციის დეტალებზე საუბრისგან, თუმცა რუსი სამხედრო ბლოგერები აღარ მალავენ, რომ ამ დონის სამხედრო თავდასხმა, ტანკების, არტილერიისა და კამიკაძე-დრონების გამოყენებით, მეორე მსოფლიო ომის შემდეგ ჯერ საბჭოთა კავშირისთვის და მერე - რუსეთისთვის არავის გაუბედავს...

რუსეთის ცენტრალური ხელისუფლებაც ცდილობს, მიჩქმალოს საბრძოლო მოქმედებების მასშტაბი კურსკის ოლქის ტერიტორიაზე, თუმცა ადგილობრივი მოსახლეობა აქტიურად პოსტავს სავრძოლო მოქმედებების შესახებ და შველას ითხოვს...

• "ბრძოლა იქნება სასტიკი"

"კურსკის ოლქის საზღვრის სუჯანის მონაკვეთზე ოპერატიული და საბრძოლო ვითარება კვლავ რთულია“, - წერს "ტელეგრამარხი "სასაზღვრო დაცვა ჯოჯოხეთიდან“. ომის მომხრე ბლოგერებისა და სამხედრო ექსპერტების უმეტესობა დარწმუნებულია, რომ ამჯერად ეს არ შემოიფარგლება მხოლოდ რუსეთის ტერიტორიაზე ხანმოკლე დარბევით. მათ მიაჩნიათ, რომ ეს გარღვევა არის ოპერაციის საწყისი ეტაპი, რომელიც მიზნად ისახავს რუსული ჯარების უკან დახევას ფრონტის სხვა ცხელი სექტორებიდან (პირველ რიგში ხარკოვისა და დონეცკის რეგიონებიდან).

"ამჟამად ყველაზე სახიფათო სიტუაციაა აქ, სუჯას ჩრდილოეთით. უკრაინის შეიარაღებული ძალები, როგორც ჩანს, ხვალ შეეცდებიან ქალაქში შემოსვლას. ბრძოლა იქნება სასტიკი“, - ამბობს რუსი სამხედრო ბლოგერი იური პოდოლიაკი.

ამასთანავე, სუმის ოლქის ხუთი თემის 23 დასახლებაში მოსახლეობის სავალდებულო ევაკუაციაა გამოცხადაა, - ამის შესახებ უკრაინის რეგიონული სამხედრო ადმინისტრაციის ხელმძღვანელმა ვლადიმერ არტიუხმა განაცხადა.

შეგახსენებთ, სუმის რეგიონი ესაზღვრება რუსეთის კურსკის რეგიონს, სადაც წინა დღით დაიწყო სასტიკი ბრძოლები.

რუსეთის ფედერაციის მთავრობამ დაავალა ფინანსთა სამინისტროს გამოყოს 1,8 მილიარდი რუბლის ტრანში კურსკის რეგიონიდან მოსახლეობის გაყვანისთვის.

ამის შესახებ რუსეთის ფედერაციის პირველმა ვიცე-პრემიერმა დენის მანტუროვმა ვლადიმერ პუტინთან შეხვედრაზე განაცხადა.

იხილეთ ასევე:

• რუსეთის კურსკის ოლქში საგანგებო მდგომარეობა გამოცხადდა