კენიის პოლიციამ ნაგავსაყრელზე გადაყრილ ჩანთებში, 10-მდე დანაწევრებული გვამი აღმოაჩინა

კენიის პოლიციამ შემზარავი ინფორმაცია გაავრცელა, რომლის მიხედვით, ნაგავსაყრელზე გადაყრილ ჩანთებში ათამდე ქალის დანაწევრებული სხეული აღმოაჩინეს.

დეტექტივები ნაირობის მუკურუს ნაგავსაყრელზე აღმოჩენილ გვამებს ახლაც ათვალიერებენ. მათი თქმით, პარასკევს ნაგვის გორაზე მოთავსებულ ტომრებში 6 ქალის დანაწევრებული ცხედარი იპოვეს. ბოლოს გაკეთებული განცხადების მიხედით კი, შაბათს საგამოძიებო სამსახურმა კიდევ 5 ჩანთა იპოვა, რომელთაგან სამში გარდაცვლილი ქალების სხეულის სხვადასხვა ნაწილები აღმოაჩინეს.

"გვინდა მოსახლეობა დავარწმუნოთ, რომ გამოძიება საფუძვლიანად ჩატარდება. არ გამოვრიცხავთ კულტებისა და სერიული მკვლელობების შემთხვევებს",- ნათქვამია პოლიციის განცხადებაში.

• შარშან კენიაში კიდევ ერთი საზარელი შემთხვევა გამოვლინდა, რომელიც რელიგიურ კულტს უკავშირდებოდა. ინდოეთის ოკეანის სანაპიროს მახლობლად მდებარე ტყეში ქრისტიანული სექტის ასობით მიმდევრის ცხედარი აღმოაჩინეს დამარხული. გამოძიების თანახმად, სექტის ლიდერმა სამოთხეში მოხვედრის დაპირებით უამრავი ადამიანი აშიმშილა, რის შედეგადაც ისინი დაიღუპნენ და საბოლოოდ ტყეში დამარხეს.

პოლიციის თქმით, ნაგავსაყრელზე მათ 9 ადამიანის ცხედარი იპოვეს, რომელთაგან შვიდი ქალს ეკუთვნის.

• გავრცელებული ინფორმაციით, ჩანთებში ნაპოვნ ცხედრებს აღენიშნებოდათ წამების და დასახიჩრების კვალი. აღსანიშნავია ისიც, რომ ნაგავსაყრელი პოლიციის განყოფილებიდან 100 მეტრის მოშორებით მდებარეობს.

სამოქალაქო საზოგადოებისა და უფლებადამცველთა კოალიციამ განაცხადა, რომ ეს შემაშფოთებელი აღმოჩენა გადასახადების ზრდასთან დაკავშირებული საპროტესტო აქციებს უკავშირდება. მათ ასევე აღნიშნეს, რომ აქციების ფონზე მოხშირებულია ადამიანების გატაცებების და გაუჩინარების შემთხვევებიც.

წყარო: theguardian

მოამზადა: ანა სიბოშვილმა