უკრაინის ეროვნული გვარდიის სამხედროების შვილები 2 კვირით საქართველოში დაისვენებენ - რას წერს პრემიერი, რომელმაც მათ სხვა მინისტრებთან ერთად უმასპინძლა
საქართველოს პრემიერ-მინისტრი ირაკლი კობახიძე, განათლების, მეცნიერებისა და ახალგაზრდობის მინისტრ გიორგი ამილახვართან ერთად, უკრაინის დედაქალაქ კიევიდან ჩამოსულ ეროვნული გვარდიის სამხედრო მოსამსახურეების შვილებს შეხვდა, რომლებიც საქართველოს მთავრობის ფინანსური მხარდაჭერით საზაფხულო ბანაკში ისვენებენ.
“განათლების, მეცნიერებისა და ახალგაზრდობის მინისტრ გიორგი ამილახვართან და პარლამენტის ვიცე-სპიკერ, უკრაინის მეგობრობის ჯგუფის ხელმძღვანელ არჩილ თალაკვაძესთან ერთად, უკრაინის დედაქალაქ კიევიდან ჩამოსულ ეროვნული გვარდიის სამხედრო მოსამსახურეების შვილებს შევხვდი, რომლებიც საქართველოს მთავრობის ფინანსური მხარდაჭერით საზაფხულო ბანაკში ისვენებენ.
ბავშვებს გავესაუბრე, მათ მთავრობის მხარდაჭერა კიდევ ერთხელ დავუდასტურე და ვახშამზე ვუმასპინძლე.
სამხედრო მოსამსახურეების შვილებისთვის ორი კვირის განმავლობაში მრავალფეროვანი კულტურულ-შემეცნებითი და გასართობი აქტივობებია დაგეგმილი. მათთვის ასევე მოეწყობა ექსკურსიები.
საზაფხულო ბანაკის პირველი ნაკადის სტუმრები ქალაქ ხარკოვიდან ჩამოსული მოსწავლეები იყვნენ.“ - აღნიშნულია განცხადებაში.