წყვილმა 50 წლიანი ბედნიერი თანაცხოვრების შემდეგ ერთად სიკვდილი გადაწყვიტა - ამისთვის მათ ევთანაზიას მიმართეს: რა გახდა მძიმე გადაწყვეტილების მიზეზი?
ნიდერლანდელი წყვილი 50 წლის განმავლობაში ბედნიერ ქორწინებაში იმყოფებოდა, თუმცა ცოტა ხნის წინ, 71 წლის ელისს დემენციის დიაგნოზი დაუსვეს, მისი მეუღლე, 70 წლის იანი კი გამუდმებულ ზურგის ტკივილს უჩიოდა. ამიტომ წყვილმა გადაწყვიტა ევთანაზიისთვის მიემართა, ივნისის დასაწყისში კი ეს აასრულეს კიდეც.
იანმა და ელისმა ერთმანეთი საბავშვო ბაღში გაიცნეს. ახალგაზრდა იანი ჰოკეის თამაშობდა ნიდერლანდების ეროვნულ ახალგაზრდულ გუნდში, შემდეგ კი სპორტული მწვრთნელი გახდა. ელისი წლების განმავლობაში სკოლის მასწავლებლად მუშაობდა. შვილს საერთო ჰობი, ნაოსნობა ჰქონდა. მოგვიანებით სატვირთო ნავი იყიდეს და ბიზნესი წამოიწყეს.
იანმა 2003 წელს ზურგზე ოპერაცია გაიკეთა, მაგრამ ტკივილებს ვერაფერს შველოდა. ტკივილგამაყუჩებლების მიღებაც შეწყვიტა, ამ პერიოდის განმავლობაში წყვილი იშვიათად საუბრობდა ევთანაზიაზე. იანის თქმით, არ სურდა ფიზიკური შეზღუდვებით დიდხანს ეცხოვრა და ვინმესთვის ტვირთი გამხდარიყო.
"თუ ბევრ წამალს სვამ, ზომბივით ცხოვრობ. ამიტომ მინდა ჩემი ტკივილი და ელისის ავადმყოფობა შევაჩერო" - ამბობდა იანი.
2018 წელს ელისმა სკოლა დატოვა. ამ პერიოდში გამოვლინდა დემენციის პირველი ნიშნები. ხოლო მას შემდეგ, რაც გაარკვია, რომ დაავადებას ვერ დაამარცხებდა, შვილთან ერთად დუო-ევთანაზიის (ერთობლივი სიკვდილი) განხილვა დაიწყო.
იმ შემთხვევაში, თუ წყვილს სურს ერთად დაასრულოს სიცოცხლე, მედიკოსები დარწმუნებული უნდა იყვნენ, რომ ერთი პარტნიორი გავლენას არ ახდენს მეორეზე. ექიმებთან შეხვედრამდე ერთი დღით ადრე ელისი, იანი, მათი ვაჟი და შვილიშვილები ერთად იყვნენ.
"დედაჩემთან ერთად სანაპიროზე წავედი, ბავშვებიც იქვე იყვნენ. საღამოს ერთად ვივახშმეთ. ცრემლები მომადგა, როცა მახსენდებოდა, რომ ეს ჩვენი ბოლო ვახშამი იყო" - ამბობს იანისა და ელისის ერთადერთი ვაჟი.
ნიდერლანდებში ნებაყოფლობითი ევთანაზია დაშვებულია იმ შემთხვევაში, თუ ექიმები პირის ტანჯვას - ფიზიკურსა თუ ფსიქოლოგიურს - შეაფასებენ, როგორც "აუტანელს", გაუმჯობესების პერსპექტივის გარეშე. 2023 წელს ნიდერლანდებში ევთანაზიას 9068 ადამიანმა მიმართა.