რა ფასად გაიყიდა პრინცესას მდიდრული კაბები და ხელწერილები - მორიგი მასშტაბური საქველმოქმედო აუქციონი, დაიანას ეფექტით
კალიფორნიაში გამართულ აუქციონზე სამეფო ოჯახის წევრების კუთვნილი ნივთების კოლექცია, მათ შორის გარდაცვლილი პრინცესა დაიანას კაბები და ჩანაწერები, 4 მილიონ ფუნტ სტერლინგზე მეტად გაიყიდა. ამის შესახებ ინფორმაციას BBC ავრცელებს.
აუქციონზე 200-ზე მეტი ნივთი იყო წარმოდგენილი და აუქციონერების მიერ დასახელდა, როგორც დაიანას პირადი ნივთების ყველაზე ვრცელი კოლექცია, მას შემდეგ, რაც მან საკუთარი საქველმოქმედო აუქციონი 1997 წელს, გარდაცვალებამდე ორი თვით ადრე გამართა.
ბრიტანელი დიზაინერის, ვიქტორ ედელშტაინის მიერ შექმნილმა მაჯენტას ფერის აბრეშუმისა და მაქმანებიანმა საღამოს კაბამ, რომელიც დაიანამ 1987 წელს, ლონდონსა და გერმანიაში ჩაიცვა, ფასით პირველი ადგილი დაიკავა და 910,000 დოლარად (720,000 ფუნტი სტერლინგი) - თავდაპირველ მინიმალურ შეფასებაზე ოთხჯერ მეტი ღირებულებით გაიყიდა.
ედელშტაინმა ასევე შექმნა ცნობილი მუქი ლურჯი კაბა, რომელიც პრინცესამ ჩაიცვა, როდესაც 1985 წელს, თეთრ სახლში ჯონ ტრავოლტასთან იცეკვა.
დაიანას საყვარელი დიზაინერების, მათ შორის ედელშტაინის, ქეროლაინ ჩარლზისა და ქეთრინ უოკერის ნამუშევრები აუქციონზე წარმოდგენილი იყო სახელწოდებით: "პრინცესა დაიანას ელეგანტურობა და სამეფო კოლექცია". აუქციონი ლოს-ანჯელესში, The Peninsula Beverly Hills-ში გაიმართა.
მიურეი არბეიდის შუაღამის ლურჯი კაბა, რომელიც პრინცესამ 1986 წელს ორჯერ, ასევე, 1987 წელს სამეფო ოპერის თეატრში "კონკიას" წარმოდგენაზე ჩაიცვა, შეფასებულ ფასზე დაახლოებით ოთხჯერ მეტი ღირებულებით - 780,000 დოლარად (617,000 ფუნტი სტერლინგი) გაიყიდა.
უოკერის მიერ შექმნილი ვარდისფერი ყვავილოვანი აბრეშუმის პერანგის ტიპის კაბა, რომელიც დიანამ 1988 წელს, რიჩმონდის სტადიონზე პრინც უილიამის სპორტულ დღეზე, ასევე, 1992 წელს ნოთინგ ჰილში, პრინც ჰარის სკოლიდან გამოყვანისას ჩაიცვა, 444,500 დოლარად (352,000 ფუნტი სტერლინგი) გაიყიდა. ამ კაბიდან შემოსავლის ნაწილი გაერთიანებულ სამეფოს კუნთოვანი დისტროფიის საქველმოქმედო ორგანიზაციას გადაეცემა.
აუქციონზე ასევე წარმოდგენილი იყო დაიანას 20-ზე მეტი ხელნაწერი წერილი, ჩანაწერი და სადღესასწაულო ბარათი.
წერილების უმეტესობა სპენსერების ოჯახის სახლის ყოფილი მოახლისთვის, მოდ პენდრისთვის იყო მიწერილი, ნორთჰემპტონშირში, სადაც დაიანა გაიზარდა.
1984 წლით დათარიღებული სამგვერდიანი ხელნაწერი წერილი, როდესაც დაიანა ჰარიზე იყო ფეხმძიმედ, თავის შეფასებაზე თხუთმეტჯერ მეტი ფასით - 44,450 დოლარად (35,000 ფუნტი სტერლინგი) გაიყიდა.
აუქციონზე წარმოდგენილი იყო ორგვერდიანი წერილიც, რომელიც პრინცესამ ბატონ და ქალბატონ პენდრის 1985 წელს მისწერა და რომელშიც უილიამისა და ჰარის ფოტოები იყო ჩაკრული. ამ წერილს დაიანამ მიაწერა: "დიდი სიყვარულით ჩვენი ოთხეულისგან" და ის 28,575 დოლარად (23,000 ფუნტი სტერლინგი) გაიყიდა.
"დღევანდელი ისტორიული აუქციონის ფენომენალური შედეგები, რომელიც პრინცესა დაიანას დაბადების დღემდე რამდენიმე დღით ადრე მოეწყო, აჩვენებს, თუ რატომ არის და ყოველთვის იქნება დაიანა მსოფლიოს ერთ-ერთი ყველაზე საყვარელი და შთამაგონებელი კულტურული ფიგურა", - განაცხადა Julien's Auctions-ის თანადამფუძნებელმა და აღმასრულებელმა დირექტორმა, მარტინ ნოლანმა.
"ეს დახვეწილი სამოსი, ფეხსაცმელები და აქსესუარები არა მხოლოდ მოდის ტენდენციებს ქმნიდა, არამედ, მის სითბოსა და ჰუმანურობას ასახავდა, რამაც დაიანა ყველა დროის ყველაზე პოპულარულ და უდიდეს სამეფო ხატად აქცია".
აუქციონი ჟაკ აზაგურის მიერ შექმნილი კაბის გაყიდვას მოჰყვა, რომელიც დაიანამ იტალიაში, 1985 წელს ჩაიცვა. მისი გაყიდვით ახალი მსოფლიო რეკორდი დამყარდა - ეს გახდა ყველაზე ძვირადღირებული კაბა, რომელიც სამეფო ოჯახის წევრს ეცვა - ის დეკემბერში, 1 მილიონ დოლარზე მეტად (792,000 ფუნტი სტერლინგი) გაიყიდა.