"პორტუგალია მაღალი კლასის გუნდია, თუმცა ჩვენც ჩვენი ამბიციები გვაქვს" - რას ამბობს ბუდუ ზივზივაძე ნაკრებსა და ევროპის ჩემპიონატზე
საქართველოს ეროვნული ნაკრების წევრი ბუდუ ზივზივაძე კომენტარს აკეთებს ევროპის ჩემპიონატზე საქართველოს მიერ მიღწეული შედეგით და ასევე პორტუგალიასთან მომავალ მატჩზე.
"მადლობას გადავუხდი გულშემატკივარს, ვინც გერმანიაში ჩამოვიდა და გვგულშემატკივრობს, მართლაც საოცარი გარემო იყო ორივე თამაშზე, ამდენი დროშა და ეროვნული ნაკრების ფორმით რომ იყო ამდენი ადამიანი, ძალიან კარგი იყო და დადებითად აისახა ჩემზე, მივულოცავ ასევე პირველ ისტორიულ ქულას, რომელიც მოვიპოვეთ ჩეხეთთან შეხვედრაში.
- ამ ორ თამაშს რაც შეეხება ორი განსხვავებული თამაში იყო, იმიტომ რომ თურქეთი უფრო ტექნიკური გუნდია, ვიდრე ჩეხეთი, ჩეხეთი ფიზიკურად უფრო ძლიერი გუნდი იყო და რაღაც ეპიზოდებში გაგვიჭირდა მეორე სართულზე ორთაბრძოლები. რის შედეგადაც მივიღეთ გოლი.
ბოლო მომენტამდე გვქონდა მოგების შანსი. მიუხედავად ამისა, მაინც ყველა ძალიან ბედნიერები ვართ, რომ ევროპის ჩემპიონატზე პირველი ქულა მოვიპოვეთ. თურქეთთან ძალიან ბევრი მომენტი გვქონდა, სამწუხაროდ, არ გაგვიმართლა რიგ ეპიზოდებში, თუმცა თამაშის ხარისხი რაღაც მომენტებში დამაკმაყოფილებელი იყო, ვფიქრობ, რომ ქართველი ხალხი ბედნიერი უნდა იყოს ამ გუნდით და უნდა იამაყოს, რომ საქართველო ღირსეულად თამაშობს ევროპის ჩემპიონატზე.
რაც შეეხება მესამე თამაშს, ასე რომ ვთქვათ, კიდევ ერთი ფინალი გვაქვს, იმიტომ, რომ თუ გავიმარჯვებთ, გავდივართ ჯგუფური ეტაპიდან და ვითამაშებთ პლეიოფში, რაც უდიდესი მიღწევა იქნება ქართული ფეხბურთისთვის. ამისთვის ფეხბურთელები მზად ვართ და ყველაფერს გავაკეთებთ რომ საქართველოს კიდევ ერთი დიდი სიხარული მოვუტანოთ. დანარჩენი უკვე 26-ში მოედანზე გამოჩნდება. ვიცით, რომ პორტუგალია კლასით მაღალი გუნდია, ჩემპიონატის მოგების ერ-ერთი ფავორიტია, თუმცა ჩვენც ჩვენი ამბიციები გვაქვს და გვსურს რომ წარმატებას მივაღწიოთ", - ამბობს ბუდუ ზივზივაძე.
ცნობისთვის, საქართველოს ეროვნული ნაკრები ევროპის ჩემპიონატზე მესამე ტურის შეხვედრას 26 ივნისს პორტუგალიის წინააღმდეგ გამართავს. მატჩი თბილისის დროით 23:00 საათზე დაიწყება.