აფხაზეთში ყველაზე პოპულარული თანამედროვე მუსიკალური 10 ჰიტი ქართველი მომღერლების შესრულებით - ვინ მონაწილეობს პროექტში?
"ერთ სიმღერას ვმღერით“ - ეს არის სახელწოდება აფხაზურენოვანი მუსიკალური ალბომისა, რომელიც "ბრავო რექორდსმა“ გამოუშვა. პროექტის ავტორების თქმით, მათი ნამუშევარი აფხაზეთის და დანარჩენი საქართველოს პოსტ კონფლიქტური კულტურული ურთიერთობების აღდგენას და გაღრმავებას ემსახურება.
პროექტის ფარგლებში დღევანდელ აფხაზეთში ყველაზე პოპულარული თანამედროვე მუსიკალური 10 ჰიტი შეირჩა და მათი ახლებურად გააზრებული არანჟირებები გაკეთდა.
"ამ იდეას დიდი ხნის ისტორია აქვს - ამ პროექტზე ჩვენი სტუდიის დაარსების დღიდან ვფიქრობდით, დაახლოებით 10 წელი, რადგან გასაკეთებლად რთული იყო. მეტ ჩართულობას მოითხოვდა, მეტ დაძაბვას. მოკლედ, სხვადასხვა ბარიერის გამო ვერ ვახორციელებდით, მაგრამ აფხაზეთის მთავრობის მხარდაჭერით, მათი სტრუქტურების დახმარებით ამ პროექტის განხორციელება მოხერხდა. ასე რომ, დიდი ხნის ოცნება ავისრულეთ“, - აღნიშნავს "ბრავო რექორდსის“ ხელმძღვანელი ზაზა შენგელია. მისი თქმით, ამ პროექტით ერთგვარი დიალოგი უნდა შედგეს აფხაზ ახალგაზრდებს შორის.
"თანამედროვე პოპულარული აფხაზური სიმღერები იმიტომ ავიღეთ, რომ გვინდოდა, მეტად მივწვდომოდით ახალგაზრდა აუდიტორიას. საერთოდ, აფხაზეთის თანამედროვე მუსიკალური ხელოვნება რუსული პაპსას დიდ გავლენას განიცდის და საკმაოდ მდარე ხარისხის ნამუშევრები აქვთ. ამიტომ სიმღერების გადარჩევას და რეპერტუარის შექმნას დიდი დრო მოვანდომეთ. ალბომზე 4 საუკეთესო არანჟირების სპეციალისტი მუშაობდა იმისათვის, რომ მუსიკალურად მრავალფეროვანი ვერსიები შექმნილიყო. მათი მუშაობით და ხელწერით საინტერესო და განსხვავებული ნამუშევრები გამოვიდა.
ვინც ამ სიმღერებს ენგურს გაღმა მოისმენს, არ ვარ დარწმუნებული, რომ ერთგვაროვანი გამოხმაურება ექნება, მაგრამ დარწმუნებული ვარ, რომ დიდი პოპულარობით ისარგებლებს და მათ მოსმენას დაიწყებენ, რადგან ორიგინალისგან განსხვავებულია".
ცნობილი გახდა, რომ პროექტზე პოპულარული ქართველი მომღერლების გარკვეულმა ნაწილმა იმუშავა. მათ შორის არიან: ნუცა თოფურია, თიკა მახალდიანი, გიორგი ცხადაძე, სოფო ხალვაში, დუეტში იმღერეს ნოდიკო ტატიშვილმა და სალომე ბაკურაძემ, გიორგი სუხიტაშვილმა და სოფო გელოვანმა, ასევე დუეტმა "ჯორჯიამ", ერთი დუეტი ეთნიკურად აფხაზი გოგონებისგან შეიქმნა, რომლებიც აფხაზეთის სახელმწიფო დრამატულ თეატრის მსახიობები არიან. პროექტზე იმუშავეს ანსამბლებმა, "ოდამ“ და "შავნაბადამ“.
როგორც ზაზა შენგელია გვეუბნება, პროექტს ყველა დიდი პასუხისმგებლობით მიუდგა. ამასთანავე, აფხაზური ენა თავისთავად რთულია, ამ სირთულის დაძლევაში აფხაზური ენის მცოდნე, თარჯიმანი ირმა ოსია დაეხმარათ. ის მომღერლებთან ინდივიდუალურადაც მუშაობდა, ამეცადინებდა და სტუდიაშიც ესწრებოდა ჩაწერის პროცესს. ფრაზა-ფრაზა აკონტროლებდა ყველაფერს.
"ჩვენ, "ბრავო რექორდსის“ ჯგუფს გვჯერა, რომ თუკი რამეზე გადის შერიგების პროცესი აფხაზეთში მცხოვრებ ჩვენს მოსახლეობასთან, ჩვენს ძმებთან და დებთან, ეს არის კულტურა. ყველაზე მოკლე გზა კულტურაში კი გახლავთ მუსიკა. ახალგაზრდებზე იმიტომაა ეს ყველაფერი გათვლილი, რომ მათ ხვალ უნდა ააშენონ ახალი საქართველო და მისი შემადგენელი ახალი აფხაზეთი. ერთად უნდა ვიყოთ. ეს ალბომი კიდევ ერთი დამხმარე ინსტრუმენტია, რომ აღდგეს სხვადასხვა თაობებს შორის ჩატეხილი ხიდები. რაც ომის შედეგებმა მოგვიტანა", - გვეუბნება ზაზა შენგელია.