"არ შეიძლება ადამიანი ასე გაწირო, ჩემს უკან დგას ჩემი ოჯახი, ჩემი მეუღლე... ამოცანა იყო, რომ ჩემს ჭარბ წონას დავცინოდი ამ მოძრაობებით" - ეკა მჟავანაძე მის გარშემო ატეხილ აჟიოტაჟზე

რამდენიმე დღის წინ, სოციალურ ქსელში გავრცელდა ეკა მჟავანაძის ცეკვის ვიდეო, რომელიც ერთ-ერთმა მაყურებელმა სპექტაკლ „ქალების“ დროს გადაიღო. მიუხედავად იმისა, რომ სპექტაკლი 2019 წლიდან მარჯანიშვილის თეატრის რეპერტუარშია, მას შემდეგ, რაც მსახიობ ეკა მჟავანაძის გმირის ცეკვის ვიდეო გავრცელდა, სოციალურ ქსელში აჟიოტაჟი გამოიწვია. იყო კრიტიკული კომენტარებიც.

გადაცემაში „ნიკოლოზის კითხვები“ მსახიობი ამბობს, რომ ვიდეო თავადაც არ მოეწონა, რადგან ცუდი რაკურსით იყო გადაღებული. ასევე ნაწყენია იმ კომენტარებზე, რომელიც საზოგადოების ნაწილმა, სპექტაკლის გმირი ქალის მიმართ არ დაიშურეს და ის მსახიობთან გააიგივეს.

ეკა მჟავანაძე:

- მე რომ ვნახე პირველად, ჯერ ერთი, ცუდად გადაღებულია. კამერა ძალიან მგრძნობიარეა და ყველა დეტალს ადიდებს, წონა გემატება... ჭარბი წონა მაქვს, რა თქმა უნდა, მაგრამ ამ ცეკვის შინაარსი და ამოცანა ეგ იყო, რომ ამ ჩემს ჭარბ წონას დავცინოდი ასეთი მოძრაობებით. ეს იყო ჩემი მიზანი, იმ სცენის დროს.

თან სპექტაკლში კლასელები არიან, სვამენ, ერთობიან, ყველაფერზე ლაპარაკობენ გახსნილად, მაიმუნობენ და ერთ-ერთი ეს პატარა მონაკვეთი დადეს. ვიღაცას მოეწონა, ვიღაცას არა.

რომ გითხრათ, რომ მესიამოვნა, ვერ გეტყვით. არ მესიამოვნა ნამდვილად. ჯერ თვითონ ვიდეო არ მესიამოვნა, არასწორად გადაღებული ქვევიდან. ცოტა გავღიზიანდი, მაგრამ არ მივაქციე ყურადღება. მერე რომ აღარ დამთავრდა და არასასიამოვნო კომენტარები დაიწერა, ცოტა გულზე მოსახვედრია.

კარგი, მე არა და, ჩემს უკან დგას ჩემი ოჯახი, ჩემი მეუღლე, ორი შვილი. შეიძლება არც მითხრან არაფერი, არ გამიტეხონ გული, ნავთი არ დაასხან ამ ყველაფერს, მაგრამ არ არის სასიამოვნო.

ეს არის თეატრი. რა მოხდა მერე... მერე გრძელდება, სხვა კონტექსტით არის, ამოვარდნილია. არ შეიძლება ასე ადამიანზე, არ იცნობ, არ იცი ვინ არის და ასე გაწირო. მარტო ჩემზე კი არ ვიძახი, საერთოდ ვამბობ, სოციალური ქსელი არაფერი გახდა, გაუფასურდა. ან თუნდაც ჩემი ვიდეო, არ მოგეწონა, ნუ დაწერ ამ საშინელ სიტყვებს. არც მე მომეწონა რაც ვნახე, არ მესიამოვნა, მაგრამ თეატრია, სპექტაკლია. შეიძლება ცუდი ითამაშო, ხოცავენ ერთმანეთს, მანიაკებსაც თამაშობენ, როლები აქვს ადამიანს ისეთი, შეიძლება მანიაკის როლი ითამაშო, მაგრამ ეს ხომ არ შეიძლება, ასე გაწირო ადამიანი.

თავიდან არ განმიცდია, მერე ცოტა რაღაც გული მეტკინა. მერე მეგობრებმა დამირეკეს, აღარ ვაქცევდი ყურადღებას, მაგრამ აღარ დამთავრდა და არ მთავრდება კიდევ. რა ვქნა ახლა, თავს ვერ მოვიკლავ, რა ვქნა. ჩემი პროფესიაა.

წაიკითხეთ ასევე:

• "ჩემი სამოთხე იქ არის, გაზაფხულს მოუთმენლად ველოდები ხოლმე, რომ ჩავიდე" - ეკა მჟავანაძე განახლებულ დედულეთზე, ჩცდ-სა და მსახიობი მამის ასრულებულ ოცნებაზე
• "ვიღაცას მოეჩვენა, რომ არტისტს ფეხი გამოუჩნდა, სასაცილოა. ამ ალიაქოთით სპექტაკლს არაფერი დააკლდება" - რას ამბობს რეჟისორი ეკა მჟავანაძის ცეკვაზე, რომელიც სოცქსელებში განსჯის საგანი გახდა