როგორ აღმოჩნდა პრინცესა დაიანას ბრილიანტის ჯვარი მეგან მარკლის სამკაულების კოლექციაში - "მიჭირს დავიჯერო, რომ მას 5 წელია ეს ყელსაბამი აქვს და აქამდე არ ჰკეთებია"

იმის მიუხედავად, რომ მეგან მარკლმა და პრინცმა ჰარიმ სამეფო ოჯახის წევრების მოვალეობის შესრულებაზე უარი თქვეს, მეგანს პრინცესა დაიანას ძვირფასი სამკაულების კოლექციის ნაწილი მაინც ერგო.

გასულ შაბათ-კვირას პრინც ჰარისთან ერთად ნიგერიაში ვიზიტისას 42 წლის მეგან მარკლს ბრილიანტის ჯვარი ეკეთა. წყაროების თქმით, ეს ყელსაბამი მარკლს ქმარმა აჩუქა და ის დედამისის კერძო კოლექციიდან უნდა ყოფილიყო. თუმცა ძვირფასმა ყელსაბამმა სოციალურ ქსელებში მითქმა-მოთქმა მაინც გამოიწვია.

"მეგანი სამკაულებს თემატურად არჩევს. მიჭირს დავიჯერო, რომ მას 5 წელია ეს ყელსაბამი აქვს და აქამდე არ ჰკეთებია",- საუბრობდა Page Six-ის გამოცემასთან წყარო, რომელიც მეგანს პირადად იცნობს.

ამასთან, უნდა აღინიშნოს, რომ დაიანა, რომელიც 1997 წელს გარდაიცვალა, ამ სამკაულით საზოგადოებაში არასდროს გამოჩენილა. "ასეთი სამკაული მასზე არასდროს მინახავს. რეალურად, დაიანა ყოველთვის არიდებდა თავს რელიგიური სიმბოლოების ტარებას, რადგან მათ ხალხის გაღიზიანება შეეძლოთ",- აცხადებს წყარო, რომელიც დაიანასთან მის გარდაცვალებამდე მუშაობდა.

პრინცესა დაიანასთანაა დაკავშირებული მეგანის ნიშნობის ბეჭედიც. ჰარის ნაჩუქარი ბეჭედი სამი ბრილიანტისგან შედგება: მის ცენტრში სამკარატიანი ქვაა, რომელსაც გვერდებზე ორი პატარა ბრილიანტი აქვს. პატარა ქვები დაიანას პირადი კოლექციიდანაა, შედარებით დიდი ბრილიანტი კი ჰარიმ ბოცვანადან, მისი საყვარელი ქვეყნიდან ჩამოიტანა.

წყარო: pagesix

მოამზადა: ანა სიბოშვილმა