"მოვუწოდებთ პარლამენტის წევრებს, გამოიჩინონ გამბედაობა და..." - რას აცხადებენ თეთრ სახლში სალომე ზურაბიშვილის მიერ "გამჭვირვალობის კანონზე" ვეტოს დადების შესახებ
თეთრ სახლში პრეზიდენტ სალომე ზურაბიშვილის მიერ "გამჭვირვალობის კანონზე" ვეტოს დადებას ეხმიანებიან. აღნიშნულ თემასთან დაკავშირებით, განცხადებას ავრცელებს თეთრი სახლის ეროვნული უშიშროების საბჭოს პრესსპიკერი, ედრიენ უოტსონი.
"მიხარია, რომ პრეზიდენტი ზურაბიშვილი იცავს საქართველოს ევროატლანტიკურ მომავალს “უცხოელი აგენტების” კანონზე ვეტოს დადების გზით", - წერს უოტსონი სოციალურ ქსელში.
ის მოუწოდებს საქართველოს პარლამენტის წევრებს, გამოიჩინონ გამბედაობა და არ გააუქმონ ზურაბიშვილის ვეტო.
"მოვუწოდებთ პარლამენტის წევრებს, გამოიჩინონ იგივე გამბედაობა და არ გააუქმონ მისი ვეტო“, - აცხადებს ედრიენ უოტსონი.
ცნობისთვის, საქართველოს პრეზიდენტმა სალომე ზურაბიშვილმა “უცხოური გავლენის გამჭვირვალობის შესახებ” კანონს ვეტო დაადო.
"დავადე ვეტო რუსულ კანონს. ეს კანონი არის თავისი არსით, თავისი სულისკვეთებით რუსული კანონი, რომელიც ეწინააღმდეგება ჩვენ კონსტიტუციას და ყველა ევროპულ სტანდარტს და წარმოადგენს შეფერხებას ევროპულ გზაზე. ვეტო სრულიად გამართულია იურიდიულად და დღესვე გადაეცემა პარლამენტს. კანონი არ ექვემდებარება არავითარ ცვლილებას, არავითარ გაუმჯობესებას. ეს კანონი უნდა გაუქმდეს“, - განაცხადა პრეზიდენტმა.
ნახეთ ასევე: