რა მოხდა ევროპელი პოლიტიკოსებისა და ოპოზიციის შეხვედრაზე - "ყველაზე მნიშვნელოვანი გზავნილი შემდეგი იყო..."
თბილისში ვიზიტით გერმანიის, პოლონეთის, ჩეხეთის, ლიეტუვის საგარეო ურთიერთობათა კომიტეტის თავმჯდომარეები იმყოფებიან, რომლებსაც საპარლამენტო ოპოზიციის წარმომადგენლები შეხვდნენ.
შეხვედრის ერთ-ერთი მთავარი თემა "უცხოური გავლენის გამჭვირვალობის შესახებ" კანონპროექტია.
გერმანიის პარლამენტის (ბუნდესთაგის) საგარეო საქმეთა კომიტეტის თავმჯდომარემ, მაიკლ როთმა შეხვედრის შემდეგ თქვა, რომ საქართველოს ნათელი მომავლის შანსს ვერ ხედავს, თუ ხელისუფლება ამ კანონს არ გაიწვევს.
"ჩვენი გზავნილი ძალიან მკაფიოა: ჩვენ ვართ საქართველოს მეგობრები, ჩვენ ვართ ქართველი ხალხის მეგობრები. საქართველოს ადგილი ევროპაშია, რაც ნიშნავს, რომ ჩვენ ძალიან ბევრს ვმუშაობთ საქართველოს გზაზე ევროკავშირისკენ, მაგრამ გთხოვთ, ძვირფასო მთავრობა, ძვირფასო მმართველო პარტია, შეაჩერეთ „უცხოური აგენტების შესახებ“ კანონი. ვერ ვხედავ საქართველოს ნათელი მომავლის ვერანაირ შანსს, თუ ხელისუფლება ამ კანონს არ გაიწვევს. ვაფასებ იმ ადამიანებს, რომლებიც ქუჩებში მშვიდობიან აქციებს მართავენ. თბილისი არის ევროპის ნამდვილი დედაქალაქი ამ რთულ დროს და იმედი მაქვს, ჩვენ გვექნება საშუალება, ვესაუბროთ მთავრობის, პარლამენტის, ოპოზიციისა და სამოქალაქო საზოგადოების წარმომადგენლებს“, - აღნიშნა მაიკლ როთმა.
კითხვაზე, ექნება თუ არა საქართველოს შანსი, ევროკავშირში გაწევრიანების შესახებ მოლაპარაკებები დაიწყოს, თუკი ეს კანონი დამტკიცდება, როთმა უპასუხა რომ „ნამდვილად არა”.
"ვერ ვხედავ მოლაპარაკებების გახსნის შანსს ამ კანონით და ევროკავშირის ეს მესიჯი ძალიან, ძალიან ნათელია“, - აღნიშნა მაიკლ როთმა.
შეხვედრას ესწრებოდნენ ოპოზიციური პარტიების წარმომადგენლები. მათაც კომენტარი შეხვედრის დასრულების შემდეგ გააკეთეს.
თამარ კორძაიას თქმით, ევროპელი პოლიტიკოსები თვლიან, რომ საქართველოს ევროპის მხრიდან უფრო მკაფიო მხარდაჭერა ექნება.
"ძალიან სამწუხაროა, როდესაც ამას საქართველოს ხელისუფლებასთან დაკავშირებით ვისმენთ. უკვე ყველამ ძალიან კარგად იცის, როგორ მართავს “ქართული ოცნება“ ქვეყანას.
მათი ჩამოსვლა არის საქართველოს საზოგადოების და ჩვენი მოქალაქეების მტკიცე მხარდაჭერა. ისინი ხედავენ, რომ საქართველოს მოქალაქეები ევროპული ინტეგრაციისთვის იბრძვიან, რასაც "ქართული ოცნება“ გააფთრებული ეწინააღმდეგება“, - განაცხადა თამარ კორძაიამ.
- "ლელოს" ერთ-ერთი ლიდერის ბადრი ჯაფარიძის თქმით, ევროპელი პოლიტიკოსების გზავნილი არის ძალიან პირდაპირი, რომ ამ კანონის მიღება გამორიცხავს ყოველგვარ შანსს ჩვენი ქვეყნისთვის, რომ გახსნას მოლაპარაკებები გაწევრიანების შესახებ.
"ეს არის ძალიან მკაფიო გზავნილი - რაც არ უნდა ითვალთმაქცოს "ქართულმა ოცნებამ", გზავნილი არის ძალიან პირდაპირი, რომ ამ კანონის მიღება გამორიცხავს ყოველგვარ შანსს ჩვენი ქვეყნისთვის, რომ გახსნას მოლაპარაკებები გაწევრიანების შესახებ. ამავდროულად, ჩვენი მეგობრები არიან ჩვენს ხალხთან ერთად, მათ სურთ საქართველო იხილონ ევროკავშირში, რაც შეიძლება სწრაფად, მაგრამ ამისთვის ჩვენ უნდა ვიმოქმედოთ იმ ღირებულებებზე დაყრდნობით, რომელიც არის ევროკავშირში. „ხალხის ძალა“ იქნება თუ „ქართული ოცნება“, მათ შეუძლიათ აკეთონ ის, რაც მათ უნდათ, მაგრამ ნებისმიერი მცდელობა მათი მხრიდან, რაც ხელს უშლის ჩვენი ქვეყნის ინტეგრაციას ევროპაში, იქნება აღკვეთილი ჩვენი ხალხის მიერ და ჩვენი ევროპელი მეგობრები პირდაპირ აფასებენ ამას, როგორც ევროკავშირში საქართველოს გაწევრიანების საბოტაჟის მცდელობას. ამიტომ, ყველამ უნდა იცოდეს, რომ ამ კანონის მიღება გამორიცხავს ყოველგვარ შანსს ევროკავშირში გაწევრიანების შესახებ მოლაპარაკებების დაწყების" - აღნიშნა ჯაფარიძემ.
- პარტია "ხალხისთვის" ლიდერმა ანა დოლიძემ აღნიშნა, რომ პარტნიორების მხრიდან მთავარი გზავნილია, რომ "რუსული კანონით" "ქართული ოცნება" უხვევს ევროკავშირის გზიდან და ამაზე პასუხი იქნება".
"მოვისმინეთ მტკიცე მხარდაჭერა ქართველი ხალხის ნების მიმართ და ეს ნება არის ის, რომ ჩვენი სამშობლო და სახლი არის ევროკავშირი. ასევე, მოვისმინეთ, რომ რუსული კანონი გასაწვევია და ამ კანონით შეუძლებელია გაგრძელდეს ევროკავშირთან დაახლოების პროცესი. ევროკავშირის მხრიდან მიმდინარეობს ფიქრი პასუხის მთელ პალიტრაზე. აქ საუბარია დაწყებული განცხადებებით, დასრულებული ძალიან მკაცრი ზომებით, მათ შორის ინდივიდუალურ სანქციებზე იმ 83 ადამიანის მიმართ, რომელთაც მოუწევთ ევროკავშირის ვიზის რიგში დგომა, თუ ეს პროცესი გაგრძელდება. ევროკავშირს ბევრი მექანიზმი აქვს - ასევე ინდივიდუალურ სახელმწიფოებს. შესაძლოა, „ქოცების“ დეპუტატები ევროკავშირის ტერიტორიაზე არ შეუშვან იმიტომ, რომ ძალიან ადვილია ინდივიდუალური სახელმწიფოს მხრიდან უბრალოდ, ქვეყანაში შესვლის აკრძალვა. მთავარი გზავნილია იქიდან - მხარდაჭერა ქართველი ხალხის ნებას, რუსული კანონი მიუღებელია, ამ კანონით „ქართული ოცნება“ უხვევს ევროკავშირის გზიდან და იქიდან პასუხი იქნება“,- განაცხადა ანა დოლიძემ.
"ევროოპტიმისტების" ერთ-ერთ ლიდერის ხატია დეკანოიძის თქმით, ყველაზე მნიშვნელოვანი გზავნილი ის იყო, რომ საქართველოს დეკემბერში მოლაპარაკებები არ გაეხსნება იმ შემთხვევაში, თუ ეს კანონპროექტი კანონად გადაიქცევა
"ეს იყო ძალიან მყარად, ძალიან ხისტად და კონკრეტულად გაკეთებული გზავნილი, რომელსაც ალბათ, საჯაროდაც გააჟღერებენ. ჩვენი მხრიდან შეთავაზებაც და მოსაზრებაც იყო და მეც ამ მოსაზრებაზე ვარ დიდი ხანია, ყველა ის ადამიანი ბიძინა ივანიშვილთან ერთად, რომელიც ხელს უშლის საქართველოს ევროპულ მომავალს და ხმას რუსულ კანონმდებლობას აძლევს, ევროკავშირში, ამერიკის შეერთებულ შტატებში და სხვადასხვა მიმართულებით მათი მგზავრობა, გადაადგილება სანქცირებული და შეზღუდული უნდა იყოს, რასაც რა თქმა უნდა, ძალიან ბევრი ჩემი კოლეგაც ეთანხმება.
მესამე გზავნილი იყო ის, რომ ოპოზიცია ამ კანონმდებლობის არანაირ მოდიფიკაციას არ განვიხილავთ. ეს „რუსული კანონი“ ჩაგდებული, ანუ გაწვეული უნდა იყოს, რასაც ჩვენი საერთაშორისო პარტნიორები ეთანხმებიან. პრინციპში, საქართველოს პრეზიდენტის ის განცხადება ძალიან დროული იყო.
მეოთხე გზავნილი იყო, რომ ევროკავშირის რეზოლუციაში მოყვანილი ძალიან მნიშვნელოვანი გადაწყვეტილებები, მათ შორის, თუნდაც, კანდიდატის სტატუსის და ვიზალიბერალიზაციის პროცესის შეჩერებაზე, არ სჭირდება რაღაც კონკრეტულად დიდი კონსენსუსი. მაგალითად, ვიზალიბერალიზაციის შეჩერება შეიძლება მოხდეს ევროკომისიის და ევროპული საბჭოს გადაწყვეტილებით, ამიტომ, საქართველოს ევროპული ინტეგრაციის საზიანო ნებისმიერი გადაწყვეტილება, რასაც ბიძინა ივანიშვილი დიდი ხანია აკეთებს, როგორც ევროინტეგრაციის საბოტაჟი და, რა თქმა უნდა, როგორც რუსული გავლენების გაძლიერება, ისე განიხილება“, - აცხადებს დეკანოიძე.
წაიკითხეთ ასევე:
- "ავტორიტარული რეჟიმების ასეთი შეტევა პრობლემაა მთელ მსოფლიოში" - რას ამბობს დიდი ბრიტანეთის საგარეო საქმეთა მინისტრი საქართველოში შექმნილ ვითარებაზე?
- "ივანიშვილი ან განგებ ანგრევს "ქართულ ოცნებას", ან ელემენტარული რაღაცების გათვლა არ შეუძლია... მოგებული არჩევნები უკვე დღეს აქვთ წაგებული" - სანდრო თვალჭრელიძე