13 წლის ბიჭი, რომელიც დაბომბვას გადაურჩა, ვერტმფრენიდან ჩამოყრილმა ჰუმანიტარულმა დახმარებამ იმსხვერპლა - პალესტინელი ზეინის უმძიმესი ისტორია

13 წლის ზეინ ოროკის სიკვდილი ცხადად აჩვენებს ღაზაში განვითარებული მოვლენების მთელ სისასტიკეს. ნოემბრის საჰაერო თავდასხმის დროს ზეინმა ოჯახის 17 წევრი დაკარგა, თვითონ კი რამდენიმე საათი გაატარა ნანგრევების ქვეშ. გასულ კვირას, როცა ამერიკული ვერტმფრენები ღაზას ჰუმანიტარულ დახმარებას აწვდიდნენ, ერთ-ერთ ყუთი ბიჭს თავში მოხვდა - ზეინი საავადმყოფოში გარდაიცვალა.

"პირველად, როცა ჩვენი სახლი დაბომბეს, ზეინი ნანგრევებიდან თავის, ხელისა და ფეხის არეში ჭრილობებით გამოვიდა. ღმერთმა გადაარჩინა... როდესაც ჰუმანიტარულ დახმარებას გვაწვდიდნენ, თავში ვერტმფრენიდან ნასროლი ყუთი მოხვდა, ხალხი ბიჭს ყურადღებას არ აქცევდა, ყველა მშიერი იყო. ჭრილობა ჰქონდა თავისა და მუცლის არეში, ასევე მენჯისა და თავის ქალის მოტეხილობა - ყველამ გადაუარა," - ამბობს ზეინის ბაბუა, ალი ოროკი.

ზეინი საავადმყოფოში გადაიყვანეს, სადაც კვირას გარდაიცვალა.

5 მარტს, 5 ადამიანი დაიღუპა და 10 დაშავდა, მას შემდეგ, რაც პარაშუტი ვერ გაიხსნა და ადამიანთა ჯგუფს დაეჯახა. 26 მარტს, დახმარების პაკეტი ღაზის სანაპიროზე, ზღვაში დაეშვა - სულ მცირე 12 ადამიანი დაიხრჩო.

შეგახსენებთ, რომ 7 ოქტომბერს, დილის 06:30 საათზე, ნეგევის უდაბნოში, კიბუც რე-იმთან ახლოს, ებრაული დღესასწაულის სუკოტის აღსანიშნავად ნოვას მუსიკალური ფესტივალის მიმდინარეობისას, "ჰამასის" შეიარაღებული დაჯგუფება ისრაელს დაესხა თავს.

საბრძოლო მოქმედებები ისრაელ-პალესტინის 18-თვიანი დაძაბულობის შედეგი იყო ღაზას სექტორში, რომელიც 1967 წლის შემდეგ ისრაელის მიერ არის ოკუპირებული და რომელსაც პალესტინელები თავიანთი სამომავლო სახელმწიფოს ცენტრად მიიჩნევენ.