სამხრეთ აფრიკაში, ფეხბურთის 24 წლის ვარსკვლავი იმ დროს ჩაცხრილეს, როცა მისი მანქანის გატაცებას ცდილობდნენ - "მიუახლოვდნენ, მანქანიდან გადასვლა უბრძანეს და..."
სამხრეთ აფრიკელი ფეხბურთელი ლუკ ფლერსი მანქანის გამტაცებლებმა ცეცხლსასროლი იარაღიდან გასროლით მოკლეს. დანაშაული იოჰანესბურგის გარეუბანში მოხდა. 24 წლის ფეხბურთელი ბენზინგასამართ სადგურზე იმყოფებოდა, როცა უცნობი პირები მიუახლოვდნენ და მანქანიდან გადასვლა უბრძანეს.
- "ეჭვმიტანილები მას ცეცხლსასროლი იარაღით დაემუქრნენ და მანქანიდან გადმოიყვანეს, შემდეგ კი ესროლეს“, - განუცხადა ადგილობრივ მედიას პოლიციის სპიკერმა, მაველა მასონდომ.
გავრცელებული ინფორმაციით, ერთ-ერთი ეჭვმიტანილი სროლის შემდეგ შემთხვევის ადგილიდან ავტომობილით გაიქცა.
24 წლის ფეხბურთელი ქვეყნის ერთ-ერთი პოპულარული საფეხბურთო კლუბის, "კაიზერ ჩიფსის" ვარსკვლავი იყო.
მომხდარს სამხრეთ აფრიკის ფეხბურთის ასოციაციის პრეზიდენტი დენი ჯორდანი გამოეხმაურა:
"ეს არის დიდი დანაკლისი მისი ოჯახისთვის, მეგობრებისთვის, თანაგუნდელებისთვის და ზოგადად ფეხბურთისთვის" - ნათქვამია განცხადებაში.
ლუკ ფლერი "კაიზერ ჩიფსს" გასულ წელს შეუერთდა, მანამდე კი "სუპერსპორტ იუნაიტედში" თამაშობდა. ადგილობრივი მედიის ცნობით, მან კარიერა 2013 წელს Ubuntu კეიპტაუნის აკადემიაში დაიწყო.