თავდასხმა რუსეთში, უკრაინის საზღვრიდან 1000 კმ-ში - უპილოტო საფრენმა აპარატებმა დრონების მწარმოებელ ქარხანას შეუტიეს, თათრეთის ორ ქალაქში აფეთქებების ხმა ისმოდა

2 აპრილის დილას, ომის მიმდინარეობიდან პირველად, რუსეთში, თათრეთის რესპუბლიკის ქალაქებში - ელაბუგასა და ნიჟნეკამსკში უპილოტო საფრენი აპარატებით თავს დაესხნენ სპეციალურ ეკონომიკურ ზონაში განთავსებულ კამიკაძე დრონების ასაწყობ ქარხანას. შედეგად, სულ მცირე 7 ადამიანი დაშავდა.

<script async src="https://telegram.org/js/telegram-widget.js?22" data-telegram-post="rbc_news/92071" data-width="100%"></script>

აფეთქებების ამსახველი ვიდეომასალა ტელეგრამის რუსულ არხებზე ვრცელდება.

ეს არის პირველი მსგავსი ინციდენტი უკრაინის წინააღმდეგ რუსეთის აგრესიული ომის დაწყების შემდეგ.

"არავითარი სერიოზული განადგურება არ მომხდარა, საწარმოების ტექნოლოგიური პროცესი არ შეფერხებულა“, - განუცხადა ჟურნალისტებს თათრეთის პრეზიდენტმა რუსტამ მინიხანოვმა.

რუსული Telegram-ის არხები აქვეყნებენ ვიდეოს იმ მომენტიდან, როდესაც უპილოტო საფრენი აპარატი ელაბუგაში ობიექტს ეჯახება. ტელეგრამის არხის "Caution, News“- ის ცნობით, ელაბუგაში დაზიანდა ჰოსტელების კომპლექსი, რომელიც 2022 წელს აშენდა სპეციალური ეკონომიკური ზონის თანამშრომლებისა და ადგილობრივი კოლეჯის "ალაბუგა პოლიტექის“ სტუდენტებისთვის.

• უკრაინის საზღვრიდან 1000 კმ-ში

სააგენტო RBC-უკრაინის ცნობით, თათრეთში თავდასხმის სამიზნე იყო ირანული კამიკაძე დრონების ("შაჰიდი") ქარხანა, რომელიც რუსეთში იწარმოება სახელწოდებით "Geran-2". ოპერაცია უკრაინის თავდაცვის სამინისტროს მთავარმა სადაზვერვო სამმართველომ (GUR) ჩაატარა. როგორც სააგენტოს უკრაინის სპეცსამსახურების წყარომ განუცხადა, შედეგად საწარმოო ობიექტების მნიშვნელოვანი ნაწილი განადგურდა.

სპეციალური ეკონომიკური ზონა "ალაბუგა“ უკრაინის საზღვრიდან 1000 კმ-ზე მეტ მანძილზე მდებარეობს. დრონების წარმოების ქარხნის გარდა, ტერიტორიაზე განთავსებულია "ელაზ-ნეფტეპროდუქტის" ნავთობგადამამუშავებელი ქარხანა, ასევე საერთო საცხოვრებლები საწარმოს თანამშრომლებისთვის.

ნიჟნეკამსკის მერმა რამილ მულინმა ადგილობრივ ნავთობგადამამუშავებელ ქარხანაზე დრონის თავდასხმის შესახებ ისაუბრა. მისი თქმით, დრონი განეიტრალდა და არავინ დაშავებულა. სააგენტო RIA Novosti, საგანგებო სამსახურებზე დაყრდნობით იუწყება, რომ თავდასხმა Taneco-ს ქარხანაზე მოხდა. შედეგად ხანძარი გაჩნდა, რაც 20 წუთში ჩააქრეს. საგანგებო სიტუაციების სამსახურის წარმომადგენელმა გამოცემას განუცხადა, რომ ქარხანას თავს სულ სამი უპილოტო საფრენი აპარატი დაესხა.

რუსული მედიის ცნობით, დარტყმები UJ-22 Airborne-ს ტიპის დრონებმა განახორციელეს. აღნიშნული დრონის ფრთების სიგრძე 4,6 მ-ია და შეუძლია მინიმუმ 20 კგ ასაფეთქებელი ნივთიერების გადატანა. ადრე გავრცელდა ინფორმაცია, რომ მათი ფრენის მაქსიმალური დიაპაზონი 800 კილომეტრი იყო, თუმცა, როგორც ჩანს, მათი მოდიფიკაცია მოხდა.