"საქართველომ საბერძნეთი გიჟურ თრილერში დაამარცხა" - რას წერს უცხოური მედია?
საქართველო-საბერძნეთის მატჩის შესახებ უცხოური მედია აქტიურად წერს და ისტორიული დაპირისპირების გადამწყვეტ მოთამაშეებად ნიკა კვეკვესკირსა და გიორგი მამარდაშვილს ასახელებს.
თამაში თავისი მკითხველისთვის იტალიურმა Il Napolista-მ ასე შეაჯამა:
"საქართველომ პენალტების სერიაში საბერძნეთი დაამარცხა და ევროპის ჩემპიონატის ფინალურ ეტაპზე გავიდა. ეს საქართველოს ისტორიაში პირველად მოხდა, ამიტომაც ქართველი გულშემატკივარი გამარჯვებას მთელი ღამე ზეიმობდა. პირველ ტაიმში თამაშის წესების დარღვევის გამო კვარაცხელიას დაშავება მაყურებლისთვის საშიში მომენტი იყო. "ნაპოლის" თავდამსხმელს სახეში დაარტყეს, მაგრამ სამედიცინო პერსონალის დახმარების შემდეგ მან თამაშის გაგრძელება შეძლო... მატჩის ძირითადი დრო 0-0 დასრულდა, დამატებითი დროს კი ფატალური აღმოჩნდა "კვარასთვის". მან ტრავმა მიიღო და სავარაუდოდ, "ნაპოლი" - "ატლანტას" მატჩს გამოაკლდება. იმედი ვიქონიოთ, რომ ქართველ ფეხბურთელს ტრავმა დიდი ხნით არ დატოვებს მოედნის მიღმა".
მატჩის შესახებ ფრანგული France 24-იც წერს:
"50 000-იან სტადიონზე შეკრებილი ათასობით ქართველი გულშემატკივარი მოედანზე შეიჭრა და ასე აღნიშნა გამარჯვება. ქართველი ფეხბურთელები ადრეც იყვნენ ევროპის ჩემპიონები საბჭოთა კავშირის ნაკრებში, რომელმაც ტიტული 1960 წელს მოიპოვა, თუმცა დამოუკიდებლობის მოპოვების შემდეგ ქართველები ევროპის ჩემპიონატზე პირველად ითამაშებენ. მათ საკუთარი ფეხბურთის ახალი ისტორიის დაწერის უფლება დიდი ბრძოლით მოიპოვეს".
"ეროვნულ გმირს" და "გამარჯვების მთავარ არქიტექტორს" - უწოდებს მამარდაშვილს ვალენსიური სპორტული გაზეთი "სუპერდეპორტე", რომელიც დღეს გარეკანზე ქართველი გოლკიპერის ფოტოთი გამოვიდა.
"პენალტების სერიაში გიორგის ფიგურა გამოიკვეთა. 23 წლის მეკარემ ბერძნების მიერ შესრულებული პირველი პენალტი მარცხენა ხელით, კატისებური რეაქციის წყალობით მოიგერია. ბაკასეტას გაგზავნილი დაბალი ბურთი ქართველმა მეკარემ აიღო... შეიძლება ითქვას, რომ ეს იქცა საკვანძო მომენტად, რამაც ქართველებს გამარჯვება მოუტანა", - წერს გამოცემა. (წაიკითხეთ სტატია გიორგი მამარდაშვილზე)
"ეს სიგიჟეა, საქართველო გერმანიაში მოდის! პლეი ოფის ფინალში საქართველომ საბერძნეთი გიჟურ თრილერში დაამარცხა. ვილი სანიოლის გუნდმა ევროპის 2004 წლის ჩემპიონს პენალტების სერიაში, 4:2 მოუგო. გადამწყვეტი თერთმეტმეტრიანის შემდეგ, სტადიონზე ათასობით ქომაგი შეიჭრა, საქართველოს დედაქალაქი თბილისი კი დიდმა ზეიმმა მოიცვა. ქვეყანაში უდიდესი სიხარულია, რადგან საქართველო პირველად გავიდა დიდ ტურნირზე", - წერს გერმანული BILD-ი.
სამგლოვიარო განწყობაა ბერძნულ პრესაში, რომელშიც მატჩის წინ საკმაოდ იმედიანი განწყობა სუფევდა, ისინი წერდნენ, რომ საქართველო მათ ნაკრებზე კლასით დაბალი გუნდი იყო და რომ აუცილებლად მოიგებდნენ.
"ის, რაც ქუჩებში თამაშის მერე ვიხილეთ, იმის პასუხია, თუ რატომ მოიგო საქართველომ. ათასობით ადამიანის სახეზე იყო აღბეჭდილი ყველაფერი. ქვეყანა ამას ელოდებოდა და მიიღო კიდეც. დროშებით შეიარაღებული ფანების ემოციების ხილვა ერთ რამედ ღირდა. ისტორიაში პირველად, საქართველოს ნაკრები ევროპის ჩემპიონატის ფინალურ ეტაპზე ითამაშებს, საბერძნეთი კი... ის მომენტია, როდესაც უბრალოდ შეგვიძლია ვთქვათ, რომ ძალიან გვეწყინა", - წერს გამოცემა SDNA.
იხილეთ ასევე: