ევაკუაცია ქობულეთისა და ჩაქვის სკოლებში - რა მოხდა სასწავლო დაწესებულებებში?

გავრცელებული ინფორმაციით, დღეს ქობულეთის 1-ელ, მე- 2, მე-3, მე-4, მე-5 და მე-6 საჯარო სკოლებში ევაკუაცია გამოცხადდა. როგორც ირკვევა, უსაფრთხოების ზომები მას შემდეგ მიიღეს, რაც ქობულეთის მე-2 საჯარო სკოლის მოსწავლეებმა ადმინისტრაციას აცნობეს, რომ მუქარის წერილი სოციალური ქსელით მიიღეს.

სკოლამ შეტყობინების შესახებ რესურს ცენტრს აცნობა, რის შემდეგაც ევაკუაცია გამოცხადდა.

ქობულეთის მუნიციპალიტეტის მერიის ცნობით, დანარჩენ სკოლებშიც ევაკუაციის გამოცხადების მიზეზი იდენტურია - მუქარის შინაარსის წერილის მიღება.

სამართალდამცავები იყვნენ მობილიზებული დაბა ჩაქვის პირველ საჯარო სკოლაშიც. როგორც სკოლის ადმინისტრაციაში "ინტერპრესნიუსს” განუცხადეს, 112-ში შევიდა შეტყობინება, რის საფუძველზეც სკოლაში სამართალდამცავები მივიდნენ. არსებული ინფორმაციით, შეტყობინება ასაფეთქებელ მოწყობილობას უკავშირდება.

"სამინისტროდან შეგვატყობინეს, რომ 112-ში შეტყობინება იყო. არ ვიცით კონკრეტულად რა. შენობაში სამართალდამცავები იმყოფებიან. სასწავლო პროცესი ქართულ სექტორში დასრულებული იყო, მიმდინარეობდა რუსული სექტორის სასწავლო პროცესი. განხორციელდა ევაკუაცია. სკოლის შენობაში არაფერი შეგვინიშნავს საგანგაშო“, - განაცხადეს დაბა ჩაქვის სკოლის ადმინისტრაციაში.