25 ათას დოლარად გაყიდული ნამუშევრები და გამოფენები მსოფლიო მასშტაბით - პლანეტის ყველაზე ცნობილი მხატვარი ღორი დაიღუპა: რა ქონება დატოვა pigcasso-მ?

pigcasso - ცნობილი მხატვარი ღორი, რომელმაც სიცოცხლეში თავისი ნახატებით მილიონ დოლარზე მეტი გამოიმუშავა, მიმდინარე წლის 6 მარტს, 8 წლის ასაკში მოკვდა. მას "მსოფლიო ისტორიაში ყველაზე წარმატებული "არაადამიანი მხატვარი“ უწოდეს.

მისმა მფლობელმა, ჯოან ლეფსონმა სიკვდილის მიზეზად ქრონიკული რევმატოიდული ართრიტი დაასახელა. როგორც ცნობილი ხდება, ხერხემლის ქვედა ნაწილის ტკივილის გამო, ღორი ორივე უკანა ფეხით კოჭლობდა.

”ძალიან სამწუხაროა, რომ ცხოველთა კეთილდღეობის ასეთი შთამაგონებელი ფიგურა აღარ არის. თუმცა, ვიხსენებ მასთან ერთად გატარებულ ბედნიერ დღეებს და მის მიერ შექმნილ შედევრებს, “- განაცხადა 52 წლის ჯოანმა Caters News-თან.

პიგკასოს თითოეული ნახატი, საშუალოდ, 25 ათასი დოლარის ფარგლებში იყიდებოდა.

მისმა ნამუშევრებმა მოწონება დაიმსახურა მთელი მსოფლის მასშტაბით. “პიგკასოს“ ნახატები ჯორჯ კლუნისა და რაფაელ ნადალის კოლექციებშია; ცხოველი ასევე "თანამშრომლობდა" Swatch-ისა და Nissan-ის ბრენდებთან.

მის მიერ შექმნილი ერთ-ერთი ყველაზე დიდი ნამუშევარი 26. 898 დოლარად გაიყიდა.

პიგკასო კი ცხოველის მიერ შესრულებული მსოფლიოს უძვირფასესი ნახატისთვის გინესის მსოფლიო რეკორდსმენი გახდა.

ის ცხოვრობდა და ხატავდა სამხრეთ აფრიკის რესპუბლიკაში, არაკომერციულ ფონდ Farm Sanctuary SA-ში, რომელიც უზრუნველყოფს უსაფრთხო თავშესაფარს მიუსაფარი ცხოველებისთვის. მის სანახავად და ცხოველების მხარდასაჭერად ფონდში უელსის პრინცესა ქეით მიდლტონიც კი იმყოფებოდა.

2018 წელს ღორი გახდა პირველი ცხოველი მხატვარი, რომელმაც უმასპინძლა კეიპტაუნში გახსნილ სოლო ხელოვნების გამოფენას. მოგვიანებით კი მისი გამოფენები გაიხსნა ნიდერლანდებში, გერმანიაში, საფრანგეთში, ჩინეთსა და გაერთიანებულ სამეფოში.

მომდევნო წელს პიგკასომ გააფორმა გარიგება შვეიცარიულ საათების მწარმოებელთან Swatch-თან.

“პიგკასოს“ ნამუშევრებმა შექმნა საკვების რეზერვი სამხრეთ აფრიკაში: მისი ნამუშევრების გაყიდვიდან მიღებული ფული ცხოველთა დახმარებას ხმარდებოდა. მათ შორის, ვეტერინარულ მომსახურებას, საკვებს, თანამშრომლებს ხელფასებს და ა.შ.

ცხოველთა დაცვის აქტივისტმა ფრანშჰუკიდან, ლეფსონმა პიგკასოს სასაკლაოდან 2016 წლის მაისში იხსნა და მას შემდეგ უვლიდა. მაშინ გოჭი ოთხი კვირის იყო. როგორც მოგვიანებით აღმოაჩინა, ცხოველს ხატვის განსაკუთრებული ნიჭიც ჰქონდა.

• ამ ფოტოზე მარჯვნივ გამოსახული პინგვინი1907 წელს დახატა პაბლო პიკასომ, როდესაც ის 26 წლის იყო. მეორე პინგვინი კი დახატა“პიგკასომ“ 2019 წელს, როდესაც ის 3 წლის გახლდათ.

“პიგკასომ“, რომელსაც სახელი კუბიზმის ცნობილი პიონერის, პაბლო პიკასოს პატივსაცემად დაარქვეს, საერთაშორისო პოპულარობა 2016 წლის ბოლოს მოიპოვა. ის ფუნჯს პირით იჭერდა და ტილოებზე ფერების ნამდვილ ზეიმს აწყობდა...

• ავტორი: თეონა რამაზაშვილი