"წელს პირველად საკურაზე, მე და ჩემი პატარა კაცი ხარება" - ტოჩინოშინის იაპონელი მეუღლე და პატარა ვაჟიშვილი: რა ფოტოებს აქვეყნებს ლევან გორგაძე?
4 თებერვალს ტოკიოში, "რიოგოკუ კოკუგიკანის" სასახლეში ქართველი სპორტსმენი ლევან გორგაძე იგივე ტოჩინოშინი სუმოდან გააცილეს. სპორტსმენი რამდენიმე თვის წინ ხარება გორგაძის მამა გახდა:
"ხარება გორგაძის მამა სამი თვის წინ გავხდი. ის ჩემი მეორე შვილია, ჩემთან ცხოვრობს და კიდევ უფრო მძაფრად განმაცდევინა რას ნიშნავს მამობა, შვილის მოვლა, მისთვის ღამის გათევა... სამწუხაროდ, ჩემს პირველ ქალიშვილზე - ანასტასიაზე არ მაქვს ამხელა ამაგი... მე იაპონიაში ვარ, ანასტასია კი - მას ენაცვალოს ჩემი სიცოცხლე, დედასთან, ჩემს ყოფილ მეუღლესთან ცხოვრობს საქართველოში, იშვიათად მაქვს მისი ნახვის ბედნიერება, ფაქტობრივად, ვერ ვმონაწილეობ მის აღზრდაში... ძალიან რთულია, მაგრამ ასე მოხდა", - აღნიშნა "კვირის პალიტრასთან" ინტერვიუში სპორტმენმა.
როგორც ინტერვიუდან ირკვევა, ხარებას დედა იაპონელია:
"რამდენიმე წელიწადია, ერთად ვცხოვრობთ. ვაჟიშვილს პაპაჩემის სახელი - ხარება დავარქვი. მამაჩემის მამას ხარიტონა ერქვა, ძალიან მიყვარდა და ჯერ კიდევ წლების წინ, იაპონიაში წამოსვლამდე გადავწყვიტე - თუ ვაჟი მეყოლება, ხარება უნდა დავარქვა-მეთქი! მადლობა უფალს, რომ ჩანაფიქრის ასრულების შესაძლებლობა მომცა".
ლევან გორგაძის "ფეისბუქპოსტიდან" ირკვევა, რომ ის ახლაც იაპონიაში იმყოფება და პატარა შვილთან ერთად გადაღებულ ფოტოებს სოციალურ ქსელში ასაჯაროებს:
"წელს პირველად საკურაზე, მე და ჩემი პატარა კაცი ხარება", - წერს ტოჩინოშინი.