რუსეთში დაბადებული, მოსკოვური სამხედრო განათლებით - ვინ არის ზალუჟნის შემცვლელი ოლექსანდრ სირსკი, რომელსაც რუსები ყასაბს უწოდებენ
უკრაინის პრეზიდენტმა ვოლოდიმირ ზელენსკიმ უკრაინის სამხედრო ძალების მეთაური ვალერი, ვალერი ზალუჟნი გაათავისუფლა და ის ოლექსანდრ სირსკით ჩაანაცვლა. სირსკი არის გენერალი, რომელმაც ბოლო 2 წელიწადში ზალუჟნიზე არანაკლები დამსახურება მოიპოვა.
გიამბობთ, ვინ არის უკრაინის ჯარის ახალი მთავარსარდალი და რა არის ცნობილი გენერალ სირსკის შესახებ:
- ადრეული წლები
ოლექსანდრ სირსკი 1965 წლის 26 ივლისს რუსეთის ვლადიმირსკის ოლქში დაიბადა. 15 წლის ასაკში უკრაინაში გადავიდა საცხოვრებლად და მას შემდეგ უკრაინაში ცხოვრობს.
საბჭოთა კავშირის პერიოდში მან მოსკოვის საერთო სამხედრო უმაღლესი სასწავლებელი დაამთავრა. სამხედრო კარიერა 1986 წელს მოტომსროლელი ოცეულის მეთაურად დაიწყო.
1996 წელს უკრაინის სამხედრო შეიარაღებული ძალების აკადემია ფრიადზე დაასრულა, ხოლო 2005 წელს უკრაინის თავდაცვის აკადემიის ოქროს მედალოსანი გახდა. დიდი პოტენციალის ახალგაზრდა შეიარაღებული ძალების მთავარ სამეთაურო ცენტრში დაასაქმეს, სადაც ხელმძღვანელის მოადგილედ მუშაობდა. ზუსტად იმ პერიოდში უკრაინის ჯარის ნატოს სტანდარტებზე გადასვლის პროცესი მიმდინარეობდა.
- ანტიტერორისტული ოპერაცია/გაერთიანებული ოპერაციის ძალები
რუსეთის უკრაინაში ჰიბრიდული შეჭრის დროს, სირსკი დონბასის ანტიტერორისტული ოპერაციების შტაბის მეთაურად დანიშნეს. კერძოდ, 2015 წლის ზამთარში, დებალცევოს ბრძოლაში, ის ერთ-ერთი მთავარი მეთაური იყო. ასევე მონაწილეობდა უკრაინელი ჯარისკაცების მართვაში უგლეგორსკის, სოფელ რედკოდუბისა და ლოგვინოვოს ბრძოლებში.
დებალცევოს პლაცდარმის ბრძოლისთვის სირსკიმ ბოგდან ხმელნიცკის მესამე ხარისხის ორდენი და გენერალ-ლეიტენანტის წოდება მიიღო.
2016 წელს მართავდა უკრაინის შეიარაღებული ძალების გაერთიანებულ ოპერატიულ შტაბს, რომელიც უკრაინელი ძალების კოორდინირებას ახდენდა დონბასში. 2017 წელს სირსკი აღმოსავლეთ უკრაინის ანტიტერორისტული ოპერაციების მეთაურად დანიშნეს, მოგვიანებით ეს სამსახური გაერთიანებული ოპერაციის ძალებად გადაკეთდა.
2019 წელს ოლექსანდრ სირსკი უკრაინის შეიარაღებული ძალების ქვეითების მეთაურად დანიშნეს, ამ თანამდებობაზე 2024 წლის 8 თებერვლამდე რჩებოდა.
2020 წლის აგვისტოში ის გენერალ-პოლკოვნიკის წოდებამდე დაწინაურდა.
- რუსეთის უკრაინაში შეჭრა
სრულმასშტაბიანი ომის დაწყების პირველივე დღიდან სირსკი კიევის დაცვას მეთაურობდა. მისი ხელმძღვანელობით ქალაქის გარშემო დაცვის ორი წრე გაკეთდა, სექტორებად დაიყო და ყველა სექტორზე მეთაურები დანიშნა. მისი გადაწყვეტილებით, დედაქალაქის ირგვლივ რამდენიმე ხიდი და დამბა ააფეთქეს, რამაც რუსების კიევში შეღწევა კიდევ უფრო გაართულა.
დედაქალაქის წარმატებულად დაცვისთვის 2022 წლის 18 მარტს სირსკიმ ბოგდან ხმელნიცკის მეორე ხარისხის ორდენი, ხოლო 5 აპრილს უკრაინის გმირის ჯილდო მიიღო.
ამის შემდეგ აღმოსავლეთ უკრაინის ძალებს მეთაურობდა, რომლებმაც 2022 წლის ზაფხულში ხარკოვიდან რუსები განდევნეს, შემდეგ კი ელვისებური კონტრშეტევა ჩაატარეს, სადაც ოკუპაციური ძალები მნიშვნელოვნად უკან დახიეს.
2022 წლის შემოდგომიდან 2023 წლის გაზაფხულამდე სირსკი სოლედარისა და ბახმუტის დაცვას მეთაურობდა. თუმცა ორივე ბრძოლა ევგენი პრიგოჟინის "ვაგნერმა“ მოიგო.
2023 წლის ზაფხულიდან ის ფრონტის ჩრდილო-აღმოსავლეთ ფლანგს განაგებდა - კუპიანსკის მიმართულების დაცვაზე პასუხს აგებდა.
- ოჯახი
ოლექსანდრ სირსკი დაქორწინებულია თამარა ხარჩენკოზე. მათ ორი ვაჟი - ანტონი და ალექსანდრე ჰყავთ.
- როგორც მედია წყაროებზე დაყრდნობით წერს, უკრაინის ჯარში ბევრს არ გაუხარდა ზალუჟნის წასვლა და გენერალ სირსკის დანიშვნა. როგორც Financial Times წერს, პირად ჩათებში ჯარისკაცების ნაწილი უკმაყოფილებას გამოთქვამს. ისინი თვლიან, რომ ზალუჟნისგან განსხვავებით, სირსკი არ უფრთხილდება ჯარისკაცების სიცოცხლეს. ერთ-ერთი უკრაინელი სამხედრო კი ღიად წერს სოციალურ ქსელ X-ში, რომ "სირსკის დაუდნობელი სწრაფვა ტაქტიკური მიღწევებისკენ ძვირფას ადამიანურ რესურსს ამცირებს".
აღსანიშნავია, რომ გენერალ სირსკის რუსმა სამხედროებმა ყასაბი შეარქვეს.
- ავტორი: ანრი კურტანიძე
ნახეთ ასევე: