"ერთმანეთს ვეჯიბრებოდით, ვინ გაძლებდა შხაპის გარეშე ყველაზე დიდხანს... ბრედს დიდხანს შეეძლო შხაპის გარეშე გაძლება" - რას იხსენებს ბრედ პიტის მეგობარი

კანადელი მსახიობი და პროდიუსერი ჯეისონ პრისტლი ბრედ პიტთან ერთად ცხოვრების აქამდე უცნობ დეტალებზე საუბრობს. როგორც ცნობილია, ჯეისონმა ბრედ პიტთან ერთად, ერთ სახლში ცხოვრების შესახებ მემუარებშიც დაწერა.

როცა ერთად ცხოვრობდნენ, იმ პერიოდში ჯერ კიდევ უცნობები იყვნენ და თვიდან თვემდე გაჭირვებით გაჰქონდათ თავი.

• მსახიობი გადაცემა Live! With Kelly and Mark-ში მიიწვიეს და ბრედთან ერთ სახლში ცხოვრების შესახებ ჰკითხეს.

"ერთი თამაში გვქონდა, ერთმანეთს იმაში ვეჯიბრებოდით, თუ ვინ გაძლებდა შხაპის გარეშე ყველაზე დიდხანს. ახლა ამას რომ ვიხსენებ, საკუთარ თავს ვეკითხები, ნეტა რაზე ვფიქრობდით მაშინ?!"

გადაცემის წამყვანმა, კელი რიპამ ჯეისონს ჰკითხა, რომელი იმარჯვებდა ხოლმე შეჯიბრში, რაზეც მსახიობმა მყისიერად უპასუხა:

"ბრედი, ყოველთვის ბრედი იყო გამარჯვებული. ვფიქრობ, ახლა ამას აღარ აკეთებს, მაგრამ მაშინ დიდი ხნის განმავლობაში შეეძლო შხაპის გარეშე გაძლება."

გადაცემის წამყვანები იმითიც დაინტერესდნენ, თუ რა ეგულებოდათ ჯერ კიდევ დამწყებ მსახიობებს თავიანთ სამზარეულოში, რაზეც პრისტლიმ მოკლედ მოუჭრა: "ლუდი".

"მაშინ ორივე ღატაკები ვიყავით. ძირითადად სუპით, იაფფასიანი ლუდით და სიგარეტით ვცხოვრობდით."

თუმცა ჯეისონის და ბრედის ასე ცხოვრება დიდხანს აღარ გაგრძელებულა, რადგან 90-იანი წლების დასაწყისში ორივეს კარიერული წინსვლა ელოდა: "ჩვენი კარიერა იმდენად განსხვავებული მიმართულებით წავიდა, რომ ერთმანეთთან კავშირი გაგვიწყდა",- ამბობდა პრისტლი 2017 წელს.

"ბრედი მსოფლიოს გარშემო მოგზაურობდა ფილმების გადასაღებად, მე კი სატელევიზიო შოუს გადაღებებზე ერთ ადგილას ვიყავი ჩარჩენილი. იმანაც ითამაშა როლი", - ამბობს ჯეისონი.

წყარო: pagesix

მოამზადა: ანა სიბოშვილმა