ბერა ივანიშვილი "დაბრუნდა": დამშვიდობება ბრაზილიასთან და ახალი კლიპი, რომელშიც საჯაროდ პირველად გამოჩნდა მისი მეორე ვაჟი
ორი დღის წინ, ბიძინა ივანიშვილის რუსთაველის თეატრში გამოჩენაზე ამ დრომდე ლაპარაკობს მედია. ამბობენ, რომ შესაძლოა ქართველი მილიარდერი პოლიტიკაში მესამედ დაბრუნდეს. ის პოლიტიკაში ჯერ არ დაბრუნებულა, მაგრამ ხანგრძლივი პაუზის შემდეგ სოციალურ ქსელში გამოჩნდა ბერა ივანიშვილი, რომელმაც ახალი კლიპი გამოაქვეყნა.
"შობა სანაპიროზე“ - ასე ჰქვია ახალ სიმღერას, რომლის ვიდეო-რგოლშიც რეპერის ოჯახის წევრები - მეუღლე და ორი შვილი ჩანს. საზოგადოებაში პირველად გამოჩნდა, წყვილის მეორე შვილი დადუ, რომელიც ამ წლის მარტში ბრაზილიაში დაიბადა.
"ჩვენ დავბრუნდით…
"შობა სანაპიროზე" ახლა გამოვიდა YouTube-ზე! ლამაზმა ქალაქმა რიო-დე-ჟანეირომ და ბრაზილიელი ხალხის სითბომ უთვალავი მოგონება დაგვიტოვა იმ ორი წლის განმავლობაში, რაც აქ ვიცხოვრეთ. მინდოდა, ამ ემოციების აღბეჭდვა ჩემს ახალ მუსიკალურ ვიდეოში. ლოგიკურია ჩვენი ბიჭის დადუსთვის, მისი სახე გამოაშკარავდეს მის დაბადების ქალაქში, ამიტომ ვიდეოს ბოლოს განსაკუთრებული მომენტი დავამატეთ. სიყვარულით ბრაზილიიდან!“ - წერს ივანიშვილი.
შეგახსენებთ, რომ პანდემიის დაწყებიდან რამდენიმე კვირაში ბერა ივანიშვილი მეუღლე ნანუკა გუდავაძესთან და უფროს შვილთან, ბერუკასთან ერთად სამხრეთ კორეაში გადავიდა საცხოვრებლად, სადაც ბერას მუსიკალური კარიერა უნდა აეწყო. მოგვიანებით წყვილი ბრაზილიაში გადავიდა, სადაც ორი წელი გაატარეს და სწორედ იქ შეეძინათ მეორე შვილი, დადუ ივანიშვილი.
როგორც მისი ნაწერიდან ჩანს, სავარაუდოდ, ოჯახი ბრაზილიას ემშვიდობება. დაბრუნდებიან თუ არა ისინი სამშობლოში, ამ დროისთვის უცნობია.
წაიკითხეთ ასევე: