ამერიკული დაზვერვის მაღალჩინოსანმა "ფეისბუქზე" პალესტინის მხარდამჭერი ფოტო გააზიარა - რა გამოხმაურება მოჰყვა CIA-ს ოფიცრის პოსტს?
CIA-ს მაღალჩინოსანმა საკუთარ Facebook გვერდზე პალესტინის მხარდამჭერი ფოტო გააზიარა - შემთხვევა 7 ოქტომბრის მოულოდნელი თავდასხმიდან ორი კვირის შემდეგ მოხდა.
Financial Times-ი აგენტის ვინაობას არ ასაჯაროებს. როგორც ცნობილია, ის კარიერის ანალიტიკოსია და ფართო გამოცდილებას ფლობს ახლო აღმოსავლეთის ყველა ასპექტში. ფეისბუქის ცალკეულ პოსტში, დაზვერვის მაღალჩინოსანმა ასევე გამოაქვეყნა სელფი, წარწერით: "თავისუფალი პალესტინა“.
"ოფიცერი კარიერის ანალიტიკოსია, რომელსაც აქვს ფართო გამოცდილება ახლო აღმოსავლეთის ყველა ასპექტში და ეს პოსტი [პალესტინის დროშის] არ იყო გამიზნული პოზიციის გამოხატვა კონფლიქტთან დაკავშირებით“, - განაცხადა სიტუაციის მცოდნე პირმა.
"CIA-ს ოფიცრები მოწოდებულნი არიან ანალიტიკური ობიექტურობისკენ, რაც არის ჩვენი, როგორც სააგენტოს ძირითადი საფუძველი. რა თქმა უნდა, აგენტებს შეუძლიათ ჰქონდეთ პირადი შეხედულებები, მაგრამ ეს არ ამცირებს მათ ვალდებულებას მიუკერძოებელი ანალიზისადმი“, - ნათქვამია CIA-ს განცხადებაში.
არც ეროვნული დაზვერვის დირექტორის ოფისს და არც თეთრ სახლს შემთხვევასთან დაკავშირებით კომენტარი არ გაუკეთებიათ. ამ დროისთვის, აგენტის სოციალური გვერდიდან ყველა პოსტი წაშლილია.
CIA-ს უფროსი ოფიცრის სოციალური მედიის პოსტი ხაზს უსვამს იმ ფაქტს, რომ ისრაელ-ჰამასის ომმა აშშ-ის მთავრობაში განხეთქილება გამოიწვია. მიუხედავად იმისა, რომ ბაიდენი მტკიცე მხარდაჭერას უცხადებს ისრაელს, მთავრობის ასობით წარმომადგენელმა და საარჩევნო კამპანიის ყოფილმა თანამშრომლებმა ხელი მაწერეს ღია წერილს ცეცხლის შეწყვეტის შესახებ. ამერიკელი დიპლომატები უკვე ხმამაღლა აკრიტიკებენ ბაიდენის საგარეო პოლიტიკას, თუმცა მათი უმეტესობა კვლავ აშშ-ის პრეზიდენტის ერთგული რჩება:
ნიუ-იორკის პოლიციამ გასულ კვირას დააკავა სტიუარტ სელდოვიცი, სახელმწიფო დეპარტამენტის ყოფილი თანამშრომელი, რომელიც თეთრ სახლში ობამას ადმინისტრაციის დროს მსახურობდა - მან მუსლიმან გამყიდველს შეურაცხყოფა მიაყენა.
