შეტაკება სამართალდამცველებთან, დამწვარი ავტობუსები და ჩამსხვრეული ვიტრინები - ძალადობრივი დემონსტრაცია დუბლინში: რას აპროტესტებდნენ მოქალაქეები (ფოტოები)

ირლანდიის დედაქალაქ დუბლინში წუხელ, მთელი ღამის განმავლობაში არეულობა იყო. საზოგადოების პროტესტმა ძალადობრივი სახე მიიღო, პროტესტი კი მას შემდეგ დაიწყო, რაც ერთი პირი, სავარაუდოდ, ალჟირელი მამაკაცი, თავს დაესხა დუბლინის ერთ-ერთ სკოლასთან მოქალაქეებს, რის შედეგადაც ხუთი ადამიანი დაიჭრა, მათ შორის სამი ბავშვია.

აქციის მონაწილეები ირლანდიის საიმიგრაციო პოლიტიკას აპროტესტებდნენ და აცხადებდნენ, რომ მოხდარი სწორედ შერბილებული პოლიტიკის ბრალია.

მათ დაწვეს ავტობუსები, შეიჭრნენ მაღაზიებში, ჩაამსხვრიეს ვიტრინები, მოხდა შეტაკება სპეცრაზმელებთან, არსებული ინფორმაციით, ზოგიერთმა დემონსტრანტმა ცეცხლსასროლი იარაღიდანაც კი გაისროლა, ბარებიდან და რესტორნებიდან ისროდნენ სკამებს.

ადგილობრივი მედიის ინფორმაციით, დემონსტანტების შეჩერების პროცესში 400-ზე მეტი პოლიციელი იყო ჩართული. მათივე ცნობით, განხორციელდა თავდასხმა პოლიციელებზეც.

განცხადება გააკეთა ირლანდიის იუსტიციის მინისტრმა, ელენ მაკენტემ და თქვა, რომ ის რაც დუბლინის ქუჩებში მოხდა, "აუტანელია“. მისივე თქმით, "მანიპულაციურ ელემენტებს არ უნდა მიეცეთ საშუალება, რომ საშინელი ტრაგედია ნგრევისთვის გამოიყენონ“. კომისარ დრიუ ჰარისის თქმით, არეულობის უკან დგას "სრულიად გიჟური ძალა, რომელსაც ულტრამემარჯვენე იდეოლოგია ამოძრავებს“.

• თავდასხმაში ბრალდებული 50 წლის მამაკაცია, რომელიც პოლიციამ უკვე დააკავა. მამაკაცს თვითონაც მიყენებული აქვს ჭრილობები. სამართალდამცველები ამბობენ, რომ სხვა დამნაშავეს ისინი არ ეძებენ.

შემთხვევა დუბლინის დროით, 13:30 საათზე, სკოლის წინ მოხდა. პოლიციის ცნობით, ხუთი წლის გოგონას, 30 წლამდე ქალს და 50 წლამდე მამაკაცს მძიმე დაზიანებები აქვთ მიყენებული. ნაკლებად მძიმე დაზიანებები აქვთ ხუთი წლის ბიჭს და ექვსი წლის გოგონას. ბიჭი უკვე საავადმყოფოდან გაწერილია.

თავდაპირველად სამართალდამცველები საუბრობდნენ შესაძლო ტერორიზმზე, თუმცა ახლა სიტყვა ტერორიზმს აღარ ახსენებენ და იკვლევენ თავდასხმის მოტივს.

"ჯერ ადრეა მოტივზე საუბარი, ჩვენ დავაკავეთ ერთი პირი და მოტივს გამოძიება დაადგენს“, - აცხადებს პოლიციის წარმომადგენელი.

პოლიციამ ხალხის დაშაშლელად ხელკეტები გამოიყენა. მედიის კითხვაზე, თუ რას აპროტესტებდნენ ისინი, პასუხობდნენ, რომ მედია არ ამხელდა სიმართლეს იმიგრაციის შესახებ.

ამ დროისთვის დუბლინში სიმშვიდეა.