სტამბოლი - მარსელის რეისზე ქალმა თვითმფრინავში იმშობიარა

რამდენიმე დღის წინ, ქალს, რომელიც საერთაშორისო რეისით სტამბოლიდან მარსელში მიფრინავდა, მშობიარობა დაეწყო. თვითმფრინავის მგზავრების თქმით, თვითმფრინავი ჯერ კიდევ მიწაზე იყო, როცა ქალმა იმშობიარა.

ერთ-ერთი მგზავრის გადაღებულ ვიდეოში, რომელიც სოციალურ ქსელში გავრცელდა, იშვიათი მოვლენის შემსწრე ადამიანების გაოცებული სახეები ჩანს.

<iframe width="656" height="369" src="https://www.youtube.com/embed/27ArMkkKQxk" title="Woman gives birth on airplane as shocked passengers gawk" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

თვითმფრინავი სტამბოლიდან მარსელში უნდა გაფრენილიყო, როცა ქალს ტკივილები დაეწყო და და იძულებული გახდა, იქვე ემშობიარა. მას საბიჰა გოკჩენის საერთაშორისო აეროპორტის მედიკოსებმა გაუწიეს დახმარება. ექიმები მადლიერმა მგზავრებმა ბოლოს ტაშითაც კი დააჯილდოვეს.

ახალშობილისა და მისი დედის ვინაობა კვლავ უცნობია, თუმცა როგორც წერენ, ჩვილი და დედა თავს კარგად გრძნობენ.

როგორც Pegasus-ის ავიახაზების თანამშრომლები ჰყვებიან, ორსულ ქალს მშობიარობა მაშინ დაეწყო, როცა ეკიპაჟი აფრენისთვის ემზადებოდა. ბორტგამცილებლებმა მას პირველადი დახმარება გაუწიეს, შემდეგ კი სამშობიაროდ თვითმფრინავის უკანა ნაწილში გადაიყვანეს.

მგზავრის გადაღებულ ვიდეოში ჩანს, როგორ ჩაჰყავს ახალშობილი ექიმ ქალბატონს თვითმფრინავიდან. გავრცელებული ინფორმაციით, ბავშვი, შემდგომი დახმარების აღმოსაჩენად, სასწრაფო დახმარების მანქანით ახლომდებარე კლინიკაში გადაიყვანეს.

თვითმფრინავში მშობიარობა საკმაოდ იშვიათი მოვლენაა, რადგან როგორც წესი, ფეხმძიმე ქალებს მესამე ტრიმესტრში ფრენის უფლებას აღარ აძლევენ. სამედიცინო საავიაციო ფირმა, MedAire აღნიშნავს, რომ ცაში მშობიარობა, საშუალოდ, 26 მილიონი მგზავრიდან მხოლოდ ერთს უწევს. ოფიციალური ინფორმაციით, ბოლო საუკუნის განმავლობაში დაახლოებით 75 ბავშვი გაჩნდა თვითმფრინავში.

MedAire-ის დირექტორმა, პაულო ალვესმა 2018 წელს მიცემულ ინტერვიუში განაცხადა, რომ თვითმფრინავი ერთ-ერთი ყველაზე არასასურველი ადგილია მშობიარობისთვის. ამის დასამტკიცებლად მას რამდენიმე მიზეზი მოჰყავს: "ერთი მხრივ, ჰაერი უფრო თხელია, ამიტომ ბავშვს სუნთქვა უჭირს. მეორე მხრივ, მშობიარობის გართულების შემთხვევაში, დედა-შვილს სათანადო სამედიცინო მომსახურებას ვერ გავუწევთ. კიდევ ერთი მინუსი ისაა, რომ თვითმფრინავის გადაუდებელი დაშვებაც დიდ დროსთანაა დაკავშირებული..."

წყარო: nypost

მოამზადა: ანა სიბოშვილმა