"ნუ გაგვიკვირდება, თუ უახლოეს თვეებში უფრო საშიშ ინფორმაციებს მოვისმენთ“ - მეცნიერების დასკვნით, 2023 ყველაზე ცხელი წელი იყო ისტორიაში, მაგრამ უარესი წინაა?
"უკვე დარწმუნებით შეგვიძლია ვთქვათ, რომ ისტორიაში 2023 წელი რეკორდულად თბილი იქნება. უკვე ამ მომენტისთვის საშუალო მაჩვენებელს ტემპერატურა ამჟამად 1,43 გრადუსით აღემატება“, - განაცხადა კოპერნიკის კლიმატის ცვლილებების სამსახურის დირექტორის მოადგილე სამანტა ბურგესმა ამ ორიდე დღის წინ.
ამასთანავე, მეცნიერების თქმით, ა.წ. ოქტომბერი ყველაზე ცხელი იყო, რაც კი მსოფლიოში ოდესმე ყოფილა მას მერე, რაც ხდება ამ მიმართულებით დაკვირვება და მონაცემების აღრიცხვა.
მათივე დასკვნით, წიაღისეული საწვავის წვითა და ბუნების განუწყვეტელი განადგურებით, კაცობრიობამ ატმოსფეროში სითბოს დამჭერი აირები შეიტანა, რამაც პლანეტის ტემპერატურა საშუალოდ 1,2 გრადუსით გაზარდა.
"შემაშფოთებელია იმის დანახვა, რომ გლობალური ტემპერატურა 2023 წლის ივნისის შემდეგ, გაცილებით თბილია, ვიდრე 2015 წლის მეორე ნახევრის დროს, როდესაც ელ-ნინიო გაცილებით ძლიერი იყო. ჩვენი პლანეტა აგრძელებს ნეგატიური ეტაპების გავლას თავის მეტეოროლოგიურ ისტორიაში და ნუ გაგვიკვირდება, თუ უახლოეს თვეებში კიდევ უფრო საშიშ ინფორმაციებს მოვისმენთ“, - აცხადებენ ექსპერტები.
მსოფლიო მეტეოროლოგიური ორგანიზაციის ცნობით, ამჟამინდელი ელ-ნინიო მინიმუმ 2024 წლის აპრილამდე გაგრძელდება და რადგანაც მისი ეფექტი, როგორც წესი, ჩამოყალიბებიდან ერთი წლის მერე ვლინდება, ექსპერტები ვარაუდობენ, რომ 2024 კიდევ უფრო ცხელი წელი იქნება.
- რა არის ელ-ნინიო?
ეს არის პროცესი, როდესაც ეკვატორული წყნარი ოკეანის გახურებული ზედაპირული წყლები აღმოსავლეთისკენ მოძრაობენ. შედეგად, ოკეანის აღმოსავლეთ და ცენტრალურ ნაწილებში თბილი ამინდები ჭარბობს. მეცნიერებმა დაადგინეს, რომ ელ-ნინიო თევზებისა და ფრინველების მასობრივ სიკვდილს იწვევს. ჰაერის ნაკადებს თან მიაქვთ წყლის უზარმაზარი მასები, რაც შემდეგ სანაპიროებს ურტყამს და იქ სტიქიურ უბედურებებს იწვევს. ერთკვირიანი წვიმა, ღვარცოფი, წყალდიდობა დიდ ზიანს აყენებს ბუნებას და ადამიანებს სამხრეთ ამერიკის ამ რეგიონებში.
- არის თუ არა გამოსავალი?
კლიმატოლოგი რედინგის უნივერსიტეტიდან, რიჩარდ ალანი მიიჩნევს, რომ სათბურის გაზების გამონაბოლქვის სწრაფი და მასიური შემცირება ყველა სექტორში, ერთ-ერთი ძირითადი საშუალებაა, რომ თავიდან ავიცილოთ რეკორდული სითბო და მისი თანამდევი მოვლენები.
გლობალური დათბობის თავიდან ასაცილებლად წლებია იბრძვიან ცნობილი ადამიანებიც. ყოველწლიურად, ჰოლივუდის ვარსკვლავები, მილიონობით დოლარის ინვესტიციას დებენ ამ პრობლემასთან გასამკლავებლად, თუმცა, როგორც ჩანს, კაცობრიობა ნაკლებად ტრაგიკულად აღიქვამს პროცესებს, რომელსაც მსოფლიოს ბევრ ადგილზე დამანგრეველი შედეგები მოაქვს.
იხილეთ ასევე:
- გაუსაძლისი სიცხე, დამშრალი ტბები და მდინარეები, ხანძრები - ევროპის ამჟამინდელი გვალვა ბოლო 500 წლის განმავლობაში ყველაზე ძლიერია: გლობალური დათბობა მსოფლიოსა და საქართველოში
- ქარიშხლები დედამიწაზე სულ უფრო მეტად გახშირდება და გაძლიერდება - მეცნიერები გვაფრთხილებენ
- "გლობალური დათბობის ეპოქა დასრულდა, გლობალური დუღილის ეპოქა იწყება.... ივლისი წლის ყველაზე ცხელი თვეა“ - გაეროს გენერალური მდივანი
ავტორი: ეკა დარჩიაშვილი