მექსიკაში, მიტოვებულ სატვირთოში 123 მიგრანტი იპოვეს, მათ შორის 34 ბავშვი - რომელი ქვეყნებიდან მიდიოდნენ ისინი ამერიკაში?
მექსიკის ცენტრალურ შტატ სან-ლუის პოტოსში, მიტოვებულ სატვირთო მანქანაში სამართალდამცავებმა 123 მიგრანტი იპოვეს, მათ შორის 34 ბავშვი.
ქალაქის მაცხოვრებლებმა პოლიციას განუცხადეს, რომ მიტოვებული სატვირთო მანქანიდან ხალხის ყვირილი ისმოდა. მათ დასახმარებლად სახელმწიფო გენერალური პროკურატურის თანამშრომლები გაგზავნეს და მიგრანტები გაათავისუფლეს. შემთხვევის შედეგად არავინ დაშავებულა.
მექსიკის საიმიგრაციო სააგენტოს ინფორმაციით, მიგრანტების უმეტესობა გვატემალადან, ნიკარაგუადან და ჰონდურასიდანაა
მიგრანტები ადგილობრივ საიმიგრაციო ცენტრში გადაიყვანეს, სადაც აგენტები მათ იურიდიულ სტატუსს განიხილავენ. ჯერჯერობით უცნობია, თუ სად მიდიოდა მიგრანტებით სავსე სატვირთო მანქანა. ვარაუდობენ, რომ კონტრაბანდისტებმა ემიგრანტები მოატყუეს და ამერიკის შეერთებულ შტატებში წაყვანას დაჰპირდნენ.
კონტრაბანდა მექსიკისთვის საკმაოდ ნაცნობი პრობლემაა: ოთხშაბათს, სასაზღვრო ქალაქ სიუდად ხუარესში, ერთ-ერთ სახლში 11 მიგრანტი იპოვეს. პოლიციამ კონტრაბანდის ბრალდებით მექსიკის სამი მოქალაქე დააკავა - ორი მათგანი 16 წლისაა.
დღეს ამერიკისა და მექსიკის საზღვარზე არალეგალური გზით გადასვლას დღეში ასობით მიგრანტი ცდილობს.