"იყო აპელირება, რომ ამ ექსპერტს ჰყავს 4 შვილი და ამ 4 შვილს ჭამა უნდა, თუმცა მაგიდაზე 12 წლის ბავშვი რომ ეწვინა, მაშინაც უნდა ეფიქრა იმაზე, რომ ისიც ბავშვი იყო..." - რას ამბობს დიდი დიღომში გარდაცვლილი ბავშვის დედა?

თბილისის საქალაქო სასამართლომ დიდ დიღომში გარდაცვლილი 12 წლის ანა იანუშაიტიტეს საქმეზე, მტკიცებულებების დაზიანებაში ბრალდებულ ექსპერტს, დავით გრიგოლიას 2 500 -ლარიანი გირაო შეუფარდა. სასამართლოს გადაწყვეტილებით, გრიგოლია სამხარაულის ექსპერტიზის ბიუროს ექსპერტის თანამდებობიდან გათავისუფლდება.

ბრალდების მხარე გრიგოლიასთვის 5000-ლარიანი გირაოს შეფარდებას და მის თანამდებობიდან გადაყენებას ითხოვდა.

ანი იანუშაიტიტეს დედა ამბობს, რომ მთელი ამ დროის განმავლობაში დავით გრიგოლია მტკიცებულებების განადგურებას ცდილობდა, რადგან ბიოლოგიური ექსპერტიზა თვენახევრის შემდეგ ჩატარდა.

"იმაზე იყო აპელირება, რომ მას ჰყავს 4 შვილი და ამ 4 შვილს ჭამა უნდა, თუმცა სასექციო მაგიდაზე 12 წლის ბავშვი, რომ ეწვინა მაშინაც უნდა ეფიქრა, რომ ეს ის ბავშვია, ამ ბავშვის მკვლელი, რომ ვიპოვო მეტად ფრთხილი და მონდომებული უნდა ვიყო და მეტად სენსიტიური უნდა ყოფილიყო...დაკარგა და შემდეგში ვიტყვი რაც დაკარგა, დააობა და სადაც შეეძლო არ აიღო და ჩათვალა, რომ არ ევალებოდა. " - ამბობს 12 წლის ანას დედა.

საქმეზე წინასასამართლო სხდომა 11 დეკემბერს, 11:00 საათზე გაიმართება.

შეგახსენებთ, მოზარდის სხეულიდან აღებული მტკიცებულებები, მათ შორის უცხო თმა და ხელებიდან და სახიდან აღებული ნიმუშები არასწორად ჩატარებული სამუშაოების გამო განადგურდა და ექსპერტიზის ჩატარება ვერ მოხერხდა. ოჯახი ვარაუდობს, რომ მოზარდი მოკლულია.

"უფლებები საქართველოს“ ადვოკატები და ბავშვის დედა ბრალდებული ექსპერტისთვის აღკვეთის ღონისძიების სახით პატიმრობის შეფარდებას ითხოვდნენ. ექსპერტს ბრალი სისხლის სამართლის კოდექსის 342-ე მუხლის პირველი ნაწილით (სამსახურებრივი გულგრილობა) აქვს წარდგენილი.

შეგახსენებთ, რომ 12 წლის ანა იანუშაიტიტეს გარდაცვალების საქმეში საკვანძო მტკიცებულებების დაზიანების შესახებ "უფლებები საქართველომ“ საზოგადოებას 2023 წლის 5 ივლისს აცნობა. საუბარია იმ კატეგორიის ნივთმტკიცებებზე, რომელთა გამოკვლევითაც, შესაძლოა, დადგენილიყო გოგონას სხეულზე უცხო ადამიანის დნმ-ის არსებობის ფაქტი ან/და საქმისათვის მნიშვნელოვანი სხვა გარემოება.

დიდ დიღომში 12 წლის მოზარდი, ანა იანუშაიტიტე გარდაცვლილი მიმდინარე წლის 16 მარტს იპოვეს.

გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.