ბაიდენი გააკეთებს იმას, რის გამოც ტრამპს აკრიტიკებდა - აშშ-მა, მექსიკის საზღვართან, მიგრანტების ნაკადის შესაჩერებლად, კედლის აშენება გადაწყვიტა

აშშ-ის პრეზიდენტის, ჯო ბაიდენის გადაწყვეტილებით აშშ - მექსიკის საზღვარზე კედლის ახალი მონაკვეთის მშენებლობა იგეგმება. როგორც ცნობილია, სთარ ქანთრის გასწვრივ, მექსიკის საზღვარზე, 32 კილომეტრის სიგრძის კედელი აშენდება.

გადაწყვეტილების მიღების მიზანი მზარდი არალეგალური მიგრაციის ნაკადის შემცირებაა. მთავრობის მონაცემებით, მიმდინარე წელს, რიო გრანდეს ველის სექტორში დაახლოებით 245 000 უკანონო გადაკვეთა დაფიქსირდა. ეს ქვეყანაში ერთ-ერთი ყველაზე დატვირთული სასაზღვრო პუნქტებია.

გადაწყვეტილებას კრიტიკა მოჰყვა ემიგრანტების დამცველებისა და მექსიკის პრეზიდენტის ანდრეს მანუელ ლოპეს ობრადორის მხრიდან.

”ეს არის უკუსვლა, რადგან პრობლემა ასე ვერ მოგვარდება“, - თქვა მან.. წარსულში ობრადორი ხშირად აქებდა ბაიდენს და აღნიშნავდა, რომ ის აშშ-ის პირველი პრეზიდენტი იყო, რომელსაც არცერთი კედელი არ აუშენებია.

მექსიკის საზღვარზე კედლის მშენებლობა აშშ-ის ყოფილი პრეზიდენტის, დონალდ ტრამპის პოლიტიკის ნაწილი იყო. რასაც იმ დროს მწვავედ აკრიტიკებდა დემოკრატიული პარტია და მათი პრეზიდენტობის კანდიდატი ჯო ბაიდენი. შეგახსენებთ, რომ ბაიდენის წინასაარჩევნო დაპირება კედლის მშენებლობის შეჩერება იყო.

ჯო ბაიდენის გადაწყვეტილებას დონალდ ტრამპი სოციალურ ქსელში გამოეხმაურა:

"ყოველთვის ვამბობდი, რომ ათასობით წლის განმავლობაში მხოლოდ ორი რამ მუშაობს: ბორბლები და კედელი! საინტერესოა, მოგვიხდის თუ არა ჯო ბაიდენი ბოდიშს მე და ამერიკას. მის ბოდიშს ველოდები!" - წერს ტრამპი სოციალურ ქსელში.