"ეს ერთი ბეწო, 85 წლის უშიშარი ლია ახეჯაკოვა იბრძვის თავის "Родина-Уродина"-ში... ვერ შეაჩერებენ" - რას წერს ნიკოლოზ რაჭველი ამჟამად თბილისში მყოფ ლია ახეჯაკოვას შესახებ

მსახიობი ლია ახეჯაკოვა თბილისშია. მან თბილისის გრიბოედოვის სახელობის თეატრში გამართა სპექტაკლი.

ახეჯაკოვასთან გადაღებულ ფოტოს ნიკოლოზ რაჭველი აქვეყნებს და წერს:

"ნათია კუპატაძეს დავესესხები ტექსტს მისი წუხანდელი სტატუსიდან:დაახლოებით 90 წუთი ენა და ტანი არ გაუჩერებია, ერთ-ერთ სცენაში ფანჯრის რაფაზე ავიდა და გადახტა. "პაკლონზე" მთელი 15 წუთის განმავლობაში ნაბიჯი არ გადმოუდგამს წინ, ასე გაუნაწილა ძალიან დიდი ოვაციები თავის კოლეგებს.თეატრ "современник"-იდან გაგდებული, ეს ერთი ბეწო 85 წლის უშიშარი ლია ახეჯაკოვა ცხოვრობს და იბრძვის თავის "Родина-Уродина"-ში (მისი სიტყვებია) და არც აპირებს გაჩერებას. ვერ შეაჩერებენ", - აღნიშნავს ნიკოლოზ რაჭველი.

ცნობისთვის, ლია ახეჯაკოვა რუსული თეატრის, "სოვრემენნიკის" სცენიდან გაუშვეს. მსახიობი რუსი "ჰეითერების" მასშტაბური თავდასხმის ობიექტად იქცა. პუტინისტები დიდ არტისტს ქვეყნიდან გაძევებითაც დაემუქრნენ. ახეჯაკოვა ამბობს, რომ ამ აღვირახსნილი თავდასხმების შემდეგ, იძულებული გახდა "ინსტაგრამზე" საკუთარი ანგარიში დაეხურა, თუმცა აცხადებს, რომ წასვლას არსად აპირებს.

ის ამ თემაზე დასმული შეკითხვის საპასუხოდ ჯგუფ DDT-ს სიმღერას ციტირებს. "Это моя "родина-уродина..." - "ეს ჩემი მახინჯი სამშობლოა... ჩვენ ის მაინც მოგვწონს, მიუხედავად იმისა, რომ სილამაზით არ გამოირჩევა. უკვე 84 წლის ვარ, არსად წავალ, დაე, ისინი წავიდნენ... მე აქ ვარ იმიტომ, რომ ეს ყველაფერი გადავიტანო, უკვე ძალიან დიდი ხანია აქ ვცხოვრობ", - ამბობდა მსახიობი.

ლია ახეჯაკოვა დიდი ხანია აპროტესტებს პუტინის რეჟიმის პოლიტიკას, ის განსაკუთრებულად შეურიგებელი აღმოჩნდა რუსეთის უკრაინაში შეჭრის შემდეგ. არ მალავს, რომ გმობს რუსეთის აგრესიას უკრაინის წინააღმდეგ.