NASA აცხადებს, რომ ამოუცნობი მფრინავი ობიექტების კვლევას ახალი ტექნოლოგიებით, მათ შორის ხელოვნური ინტელექტის დახმარებით იწყებს
NASA ამოუცნობ მფრინავ ობიექტებზე ერთწლიანი კვლევის დასკვნებს აქვეყნებს. მათი თქმით, კვლევის მომდევნო ეტაპზე გადასასვლელად მათ ახალი სამეცნიერო ტექნიკა, ხელოვნური ინტელექტი და სატელიტები სჭირდებათ. NASA-ს მეცნიერები მიიჩნევენ, რომ უცხოპლანეტელების გარშემო არსებული სტიგმა უნდა შევცვალოთ და მათ ახლებური აღქმით შევხედოთ. კვლევა დაახლოებით 1 წლის წინ დაიწყო და 100 000 დოლარი დაჯდა.
NASA-ს 33-გვერდიან დასკვნაში ვკითხულობთ, რომ უცხოპლანეტელების ირგვლივ არსებული უარყოფითი დამოკიდებულებები მათ ობიექტური მონაცემების შეგროვებაში ხელს უშლის. თუმცა აშშ-ს ხელისუფლების აზრით, ნასას ჩართულობა ხელს შეუწყობს ამოუცნობი მფრინავი ობიექტის (ამო) ფენომენის გარშემო სტიგმის შემცირებას. მათი თქმით, იმდენად ცოტა მაღალი ხარისხის კვლევა ტარდება, რომ მეცნიერული დასკვნების გაკეთება შეუძლებელი ხდება.
NASA-ს ადმინისტრატორმა, ბილ ნელსონმა განაცხადა, რომ სააგენტოს სურს დაუდგენელი ანომალიური ფენომენების გარშემო საუბარი ნაკლებ სენსაციური და უფრო მეტად მეცნიერული გახდეს. ნელსონმა დასძინა, რომ სპეციალურად შექმნილმა ჯგუფმა ჯერ კიდევ ვერ მიაგნო რაიმე ნიშანს, რომ ამოუცნობი მფრინავი ობიექტები არამიწიერი წარმოშობისანი არიან.
16-წევრიანმა ჯგუფმა სამომავლო გეგმებიც გაამხილა და დასძინა, რომ ხელოვნური ინტელექტი და ტექნოლოგიები ამოუცნობი ფენომენების შესასწავლად აუცილებელ ატრიბუტებს წარმოადგენენ.
"NASA გამჭვირვალეობას დაიცავს", - განაცხადა ნელსონმა.
მკვლევართა ჯგუფის თავმჯდომარემ და სამეცნიერო კვლევითი ჯგუფის პრეზიდენტმა, დევიდ სპერგელმა კი თქვა, რომ ამოუხსნელი მოვლენების უმეტესობის უკან თვითმფრინავები, დრონები, ბუშტები ან ამინდის პირობები დგას.
ხელისუფლებას ურჩევნია, რომ ტერმინ "ამოუცნობი მფრინავი ობიექტების" ნაცვლად "დაუდგენელი ანომალიური ფენომენები" გამოიყენოს. თავად ნასა კი მათ აღწერს, როგორც ცაში ან სხვაგან აღმოჩენილ მეცნიერულად ამოუხსნელ ან დაუდგენელ ობიექტებს.
NASA-ს თქმით, ისინი აქტიურად არ ეძებენ ამოუცნობ მფრინავ ობიექტებს, მაგრამ მათ დედამიწის გარშემო მოძრავი კოსმოსური ხომალდების ჯგუფი ჰყავთ, რომლებიც ცდილობენ დაადგინონ, უცნაური მოვლენების უკან ბუნებრივი მიზეზი იმალება თუ რაიმე სხვა.
წყარო: nbcnews
მოამზადა: ანა სიბოშვილმა