ნორვეგიის პრინცესა მარტა ლუიზა  ქორწინდება შამანზე, რომელიც ამტკიცებს, რომ მკვდრეთით აღდგა - რას აცხადებს სამეფო ოჯახი?

ნორვეგიის პრინცესა მარტა ლუიზამ და მისმა ამერიკელმა პარტნიორმა, თვითგამოცხადებულმა შამანმა დიურეკ ვერეტმა, მომავალი ზაფხულისთვის ქორწილის თარიღი გამოაცხადეს. მათი ნიშნობა ჯერ კიდევ 2022 წლის ივნისში შედგა, წყვილმა პატარძლის მამისგან კურთხევა მიიღო - ნორვეგიის მეფე ჰარალდ V-მ მარტას და დიურეკს მიულოცა და განაცხადა, რომ სიამოვნებით მიიღებს დიურეკს ოჯახში.

ვერეტი აფროამერიკელი მწერალი და შამანია. ის სამედიცინო კონსულტაციებს სპეციალური განათლებისა და კვალიფიკაციის გარეშე ეწევა. კერძოდ, ის ამტკიცებს, რომ კიბო თავად ხალხის არჩევანია და "ინტერნეტში" ყიდის მედალიონებს, რაც, მისი მტკიცებით, ადამიანებს კოვიდისგან იცავს.

პრინცესა მარტა ლუიზა, საქმროს მსგავსად, ალტერნატიული მედიცინით არის გატაცებული და შარშან ამ საქმის გამო სამეფო მოვალეობებიც კი დათმო. ის ასევე აცხადებს, რომ ანგელოზებთან ურთიერთობს.

შამანისა და პრინცესას ქორწილი ულამაზეს საკურორტო ქალაქ გეირანჯერში, ფიორდის სანაპიროზე გაიმართება. ეს ადგილი შეტანილია იუნესკოს მსოფლიო მემკვიდრეობის ძეგლების სიაში.

"მოხარულები ვართ, რომ დიურეკი შეუერთდება ჩვენს ოჯახს და მოუთმენლად ველით ამ მნიშვნელოვანი დღის აღნიშვნას ახალდაქორწინებულებთან ერთად“, - ამბობენ ნორვეგიის მეფე და დედოფალი ოთხშაბათს გამოქვეყნებულ განცხადებაში. ”მარტას და დიურეკს ყველაფერ საუკეთესოს ვუსურვებთ”.

ჰოლივუდის გურუ დიურეკ ვერეტი ამტკიცებს, რომ "მეექვსე თაობის შამანია" და აცხადებს, რომ მკვდრეთით აღდგა და ტრაგიკულ მოვლენებამდე ორი წლით ადრე იწინასწარმეტყველა 11 სექტემბრის ტერაქტები ამერიკაში. ის ასევე აღიარებს, რომ ყველას არ მოსწონს მისი შეხედულებები და რწმენა, მაგრამ აცხადებს, რომ მის მიმართ ყოველგვარი კრიტიკა მხოლოდ რასიზმის გამოვლინებაა.

პრინცესა მარტა ლუიზა ასევე მიიჩნევა რთულ პერსონად ნორვეგიაში, რადგან გატაცებულია ალტერნატიული მედიცინით. ბიზნესიდეების პოპულარიზაციისთვის ტიტულის ბოროტად გამოყენების გამო ის არაერთხელ გაუკრიტიკებიათ.

ქალი თავად დარწმუნებულია, რომ ალტერნატიული მედიცინა მნიშვნელოვანი დამხმარე უნდა იყოს სამედიცინო პრაქტიკაში. მარტამ შექმნა სპეციალური სკოლაც, რათა დახმარებოდა ადამიანებს, "თავიანთ შინაგან ანგელოზებთან დაკავშირებაში“. პრინცესას ყოფილი ქმარი, მწერალი არი ბენი გახლდათ, რომელიც ცოლს 2017 წელს დაშორდა. ნორვეგიული მედია სარკასტულად წერს, - როგორც ჩანს, კაცმა ვერ იპოვა თავისი შინაგანი ანგელოზი, დეპრესიაში ჩავარდა და 2019 წელს თავი მოიკლაო.

მარტა ლუიზა მეფე ჰარალდის უფროსი ქალიშვილია, მაგრამ ნორვეგიაში მოქმედი მემკვიდრეობის კანონის თანახმად, ის მხოლოდ მეოთხეა ტახტის რიგში - ძმისა და ორი ძმისშვილის შემდეგ.