Nasa-ს მეცნიერებმა ერთ-ერთ ეგზოპლანეტაზე წყლისა და სიცოცხლის არსებობის ნიშნები აღმოაჩინეს

NASA ჯეიმს ვების კოსმოსური ტელესკოპის საშუალებით აღმოჩენილი ახალი მტკიცებულებების საფუძველზე ვარაუდობს, რომ შორეულ ეგზოპლანეტა (ექსტრასოლარული, ანუ პლანეტა მზის სისტემის გარეთ), K2-18b-ზე, შესაძლოა, სიცოცხლის ნიშნები არსებობდეს. დასაშვებია, რომ დედამიწიდან 120 სინათლის წლის მანძილზე მდებარე კოლოსალურ პლანეტაზე წყლები მიედინება და არც ისაა გამორიცხული, მასზე საარსებო პირობებიც იყოს, იტყობინება NASA.

K2-18b ჯუჯა ვარსკვლავის, K2-18-ის ორბიტასთან ახლოს მდებარეობს და დედამიწასთან შედარებით, 8.6-ჯერ უფრო მასიურია. ვების დაკვირვებებმა აჩვენა, რომ ეგზოპლანეტას ატმოსფეროში დიდი რაოდენობით მეთანი და ნახშირორჟანგი აქვს. ნახშირბადის შემცველი მოლეკულების არსებობა, ამიაკის დეფიციტთან ერთად, შეიძლება წყალბადით მდიდარ ატმოსფეროზე მიუთითებდეს, რომელიც ოკეანის სამყაროს უნდა აკრავდეს, ნათქვამია NASA-ს რელიზში.

ნახშირბადი კი დედამიწაზე სიცოცხლის არსებობის ერთ-ერთ საფუძველს წარმოადგენს.

მანამდე, 2019 წელს ჰაბლის კოსმოსურმა ტელესკოპმა, K2-18b ეგზოპლანეტის ატმოსფეროში წყლის ორთქლის ნიშნები აღმოაჩინა. სწორედ ამან უბიძგა მეცნიერებს, რომ K2-18b-ზე შემდგომი კვლევები ეწარმოებინათ.

მეცნიერები ვების ტელესკოპის გამოყენებით ცდილობდნენ მოეძებნათ, კონკრეტულად რა ელემენტებია პლანეტის ატმოსფეროში.

უახლეს დაკვირვებებში კიდევ ერთი საოცარი რამ აღმოაჩინეს: შესაძლოა, ეგზოპლანეტაზე განსაკუთრებული მოლეკულა, დიმეთილ სულფიდი იყოს. NASA-ს თანახმად, დედამიწაზე დიმეთილ სულფიდს "მხოლოდ სიცოცხლე აწარმოებს".

"დედამიწის ატმოსფეროში არსებული დიმეთილ სულფიდის უდიდესი ნაწილი საზღვაო გარემოში არსებული ფიტოპლანქტონიდან გამოიყოფა".

თუმცა ასტრონომი ნიკუ მადჰუსუდჰანი ადრეული დასკვნებისგან თავს იკავებს. მისი თქმით, დამატებითი კვლევაა საჭირო იმის დასადასტურებლად, მართლა არსებობს თუ არა ეგზოპლანეტაზე დიმეთილ სულფიდი. და მაშინაც კი, თუ მეცნიერები ქიმიური ნაერთის K2-18b-ზე არსებობას დაადასტურებენ, ეს არ მოგვცემს იმის სრულ გარანტიას, რომ იქ სიცოცხლის ფორმები ნამდვილად არსებობს.

წყარო: cnn

მოამზადა: ანა სიბოშვილმა