"ჩემს ძმას ხუთი ტყვია ესროლეს" - ალჟირში მოკლეს ტურისტები, რომლებსაც გზა აერიათ და ალჟირის წყლებში აღმოჩდნენ

ალჟირში ორი ტურისტი მოკლეს. BBC-ის ინფორმაციით, მაროკოში დასასვენებლად ჩასული 4 ტურისტი, ზღვის სკუტერით სეირნობის დროს, ალჟირის კონტროლირებად სანაპირო წყლებში აღმოჩნდა, რის გამოც ქვეყნის სანაპირო დაცვამ მათ ცეცხლი გაუხსნა. შემთხვევის შედეგად ორი ტურისტი დაიღუპა. ერთ-ერთი გარდაცვლილი 29 წლის ბილალ კისია.

ბილალის ძმა, მუჰამედი მედიასთან საუბრისას ამბობს, რომ ცურვისას ტურისტებს გზა აერიათ და ალჟირის წყლებში შემთხვევით აღმოჩნდნენ. ამ დროს კი სანაპირო დაცვამ ცეცხლი გაუხსნა.

"მე ტყვია არ მომხვდა, მაგრამ ჩემი ძმა მოკლეს. მას ხუთი ტყვია ესროლეს“, - ამბობს მუჰამედი. მეორე გარდაცვლილის ვინაობა არ გასაჯაროებულა.

მაროკოს მთავრობის სპიკერმა უარი თქვა სროლის შესახებ კომენტარის გაკეთებაზე და მედიას განუცხადა, რომ ეს "მართლმსაჯულების საქმეა“. მომხდართან დაკავშირებით კომენტარი არც ალჟირს გაუკეთებია.