"სინანული მინდა გამოვხატო იმასთან დაკავშირებით, რომ დათო ჯელაძეს გული ვატკინე" - ირაკლი კობახიძე

მმართველი პარტიის თავმჯდომარე ირაკლი კობახიძე რაჭაში იმყოფება. როგორც მან ჟრნალისტებს განუცხადა, ის შეხვდა მეწყრის ზონაში მოყოლილ დავით ჯელაძეს და გაესუბრა მას. კობახიძის თქმით, ის ნანობს, რომ დავით ჯელაძეს "გული ატკინა".

"მე მქონდა სატელეფონო საუბარი დავით ჯელაძესთან, ასევე შევხვდი მას. პირველი რაც მინდა გითხრათ, ჩემი შთაბეჭდილება მინდა გაგიზიაროთ, დათო გულიანი, ვაჟკაცი, რაჭველი კაცია. მან დეტალურად გაიხსენა ისტორია, რომელიც გადახდა. წარმოუდგენელი ისტორიაა, რეალურად მან ყველაფერი გააკეთა იმისთვის, რომ მისი დისშვილი უსაფრთხო ტერიტორიაზე გაეყვანა. თავის თავს აჯობა, ისეთი გზა გაიარა.

მე მინდა განვმარტო რაზე იყო საუბარი, იყო ბრიფინგი სადაც ერთ-ერთმა ჟურნალისტმა მაჩვენა ფოტო, რომელიც პირველად ვნახე, იცით რომ ხშირად ყალბი ფოტოები ვრცელდება და არც ვიცოდი, ვის მიერ იყო დადებული და რა იყო ასახული. აქედან გამომდინარე კითხვა დავსვი იმასთან დაკავშირებით, თუ რამდენად შეესაბამებოდა სინამდვილეს ეს ფოტო და მოცემულობა. ამის შემდეგ გავერკვიე ყველაფერში.

სინანული მინდა გამოვხატო იმასთან დაკავშირებით, რომ დათო ჯელაძეს გული ვატკინე, რაც მან თქვა. ეს არის დასანანი.”

ცნობისთვის, ირაკლი კობახიძემ ორი დღის წინ, ბრიფინგზე განაცხადა, რომ "პრაქტიკულად წარმოუდგენელია" იმ გზის გავლა მეწყერის დროს, რაც შოვში, სტიქიის ეპიცენტრში მოყოლილმა დავით ჯელაძემ დისშვილთან, პატარა მაშოსთან ერთად გაიარა.

ასევე იხილეთ:

• "სიმართლე არ იკარგება" - დავით ჯელაძე კობახიძის განცხადებაზე
• "გადავამოწმებთ, მაგრამ ცოტა მეეჭვება..." - რა განაცხადა ირაკლი კობახიძემ დავით ჯელაძეზე, რომელმაც მეწყრიდან დისშვილი ზურგით გამოიყვანა
• "კობახიძის განცხადებამ შოკში ჩამაგდო, გამანადგურა, თურმე ყველაფერი, რაც მოვყევი, ტყუილი იყო - ასეთი შეურაცხყოფილი არასდროს ვყოფილვარ" - დავით ჯელაძე