"მას საქართველო არ მიიღებს და ალბათ რუსეთში ან სომხეთში წავა" - დრანდის ციხიდან გაიქცა პატიმარი, რომელიც სამშვილიანი მამაკაცის მკვლელობაშია ბრალდებული: რას წერენ აფხაზები მომხდარზე?

დრანდის ციხიდან მკვლელობისთვის ბრალდებული გურგენ კირაკოსიანი გაიქცა. აფხაზური მედიის ცნობით, მან საპატიმრო 13 აგვისტოს დატოვა, თუმცა სამართალდამცავი უწყებები აღნიშნულთან დაკავშირებით ინფორმაციას არ ავრცელებდნენ. ერთ-ერთი ვერსიით იმიტომ, რომ ეგონათ, მას საქმის გახმაურებამდე დააკავებდნენ, თუმცა ვერ შეძლეს...

Апсныпресc-ის ცნობით, გურგენ კირაკოსიანი, 2022 წლის 6 თებერვალს დააკავეს და ადამიანის მკვლელობისთვის 15 წელი ჰქონდა მისჯილი.

"ნასვამ მდგომარეობაში მყოფმა კირაკოსიანმა, სოფელ კამანში, კამათის ნიადაგზე, კალაშნიკოვიდან ცეცხლი გაუხსნა ედუარდ ქეცბას, რომელიც მიღებული ჭრილობებისგან ადგილზე გარდაიცვალა... მომხდარის შემდეგ სოფელ კამანის ტყეში დაიმალა, სადაც რამდენიმე დღის შემდეგ აფხაზურმა მილიციამ დააკავა და მკვლელობის, იარაღის უკანონო შენახვისა და ტარების მუხლით, სოხუმის რაიონულ სასამართლოში გაასამართლეს" - წერს გამოცემა.

• კირაკოსიანის დრანდის ციხიდან გაქცევამ ადგილობრივი მოსახლეობა გააღიზიანა. მათი თქმით, დამნაშავე გაქცევას დამოუკიდებლად, ციხის ადმინისტრაციის წარმომადგენლის ან ზედამხედველის გარეშე ვერ დაგეგმავდა. სხვების თქმით, დრანდის ციხიდან გაქცევებს უკვე სერიული ხასიათი აქვს და თუ ვინმე მოინდომებდა, შეუძლებელი არაფერია...

"დრანდის ციხიდან, რაც მე ვიცი, ბოლო ხანებში სამი ადამიანი გაიქცა, ეს რაც ჩვენი საახლობლოდან გავიგე... ერთ-ერთი მათგანი პედოფილიაში იყო ბრალდებული, მაგრამ გოგონას ოჯახს ე.წ. კრიშა არ ჰყავდა და არც არავის გაუხმაურებია ეს ამბავი. ითქვა, რომ დამნაშავე, დაცვის დახმარებით გაიქცა. თუ ვინმე იკითხავს, ვუპასუხებ, რომ ციხის დაცვას ძალიან დაბალი ანაზღაურება აქვს, უმეტესად სამსახურში არც კი დადიან, რადგან საწვავის და ან გზის ფული არ აქვთ. მილიციაზე კი თქვა ჩვენმა პრეზიდენტმა, ფეხსაცმელებიც კი არ აქვთ, სამსახურში რომ იარონო... ჰოდა, მოშლილი სისტემიდან გაქცევა რატომ გიკვირთ" - წერს ოქსანა ტურნანბა.

"ეს კაცი მკვლელობისთვის იჯდა, ოღონდ რეციდივისტია. პირველი საქმეც ჰქონდა, ასევე კაცი მოკლა, 18 ჭრილობა მიაყენა. მაშინ აფხაზმა გამოიყვანა, მეორე შემთხვევაზე, სამი შვილის მამა მოკლა, ქეცბა... როდესაც ჰკითხეს, რატომ ჩაიდინა ეს, უპასუხა, რომ ნარკოტიკული ზემოქმედების ქვეშ იყო, მოკლული ედუარდ ქეცბა ჩემი ნათესავი იყო, ერთი უბრალო, მშრომელი კაცი, ამიტომაც არ ატყდა მის მკვლელობაზე ამბები, აფხაზეთში ხომ უფულოები ადამიანებად არ ითვლებიან... ახლა ისმის კითხვა - როგორ მოახერხა გაქცევა?!" - წერს დაურ ქეცბა.

"ვითომ გაოცებული რომ არიან, როგორ მოახერხაო. არადა, ყველამ იცის, რომელი ჯგუფი რა მუხლზე, რომელ დანაშაულზე მუშაობს - ნარკოდილერებზე სხვა არის, დაჭრაზე, მკვლელობაზე, თაღლითობაზე. განსაკუთრებული ტაციაობა აქვთ უცხო ქვეყნის მოქალაქეებზე, რომელთა უმეტესობაც ნარკორეალიზაციისთვის იხდიდა სასჯელს, ეს კი ნიშნავს, რომ მას ან თავად აქვს ფული, ან მფარველი ჰყავს, რომელიც ციხეში დიდხანს არ დატოვებს. კირაკოსიანს დიდი ალბათობით კარგი დამგეგმავი ეყოლებოდა და სავარაუდოდ, მას ქვეყანა უკვე დატოვებული აქვს. სამაგიეროდ, ვიღაცამ კარგი ფული გააკეთა" - მიაჩნია ასმათ არძინბას.

"სომეხს საქართველო არ მიიღებს, ამიტომ, ალბათ თავის რუსეთში ან სომხეთში გაიქცევა... ფული ჰქონია და არც ფსოუზე გადასვლა გაუჭირდება. ყველანი ერთად ცირკში ვცხოვრობთ, რომელსაც ბოროტი რეჟისორი ჰყავს" - მიაჩნია ვანდა ანქვაბს.