აშშ-ის კინომსახიობთა გილდია, რომელიც 160 000 მსახიობს აერთიანებს, ბოლო 60 წლის განმავლობაში, ყველაზე დიდი გაფიცვისთვის ემზადება - რას ითხოვენ მსახიობები?

აშშ-ის კინომსახიობთა გილდია (The Screen Actors Guild (SAG-AFTRA), რომელიც 160 000 მსახიობს აერთიანებს, ბოლო 60 წლის განმავლობაში, ყველაზე დიდი გაფიცვისთვის ემზადება. მსახიობები ერთი მხრივ მხარს უჭერენ და სოლიდარობას უცხადებენ სცენარისტებს, რომლებიც უკვე კარგა ხანია ანაზღაურების გაზრდას ითხოვენ და ამასთანვე გილდიის წარმომადგენლების გიგანტური კინომწარმოებელი და სტრიმინგ კომპანიებისგან მოითხოვენ, არ დაუშვან ამ სფეროში ხელოვნური ინტელექტის გამოყენება.

გაფიცვის გამართვა მას შემდეგ გადაწყდა, რაც გილდიასა და სტრიმინგ კომპანიებს შორის მოლაპარაკება ვერ შედგა. ინდუსტრია ახლა მწერლების და მსახიობების პირველი ერთობლივი გაფიცვისთვის ემზადება.

კინომსახიობთა გილდიაში აცხადებენ, რომ ორგანზაციის მოლაპარაკების კომიტეტმა ერთხმად მისცა ხმა გაფიცვის რეკომენდაციას. განცხადებაში ნათქვამია: "ოთხ კვირაზე ხანგრძლივი მოლაპარაკებების შემდეგ, კინემატოგრაფიისა და ტელევიზიის პროდიუსერების ალიანსი (AMPTP) უარს აცხადებს, რომ Sag-Aftra-ს წევრებთან სამართლიან გარიგებაზე წავიდეს".

AMPTP არის დაწესებულება, რომელიც წარმოადგენს მთავარ სტრიმერებს და კინოსტუდიებს, როგორიცაა Amazon, Apple, Disney, NBCUniversal, Netflix, Paramount, Sony და Warner Bros და Discovery.

მოსალოდნელია, რომ გაფიცვა მყისიერ გავლენას მოახდენს ამ ზაფხულის პოპულარული ფილმების საჯარო სარეკლამო ღონისძიებებზე. ზოგიერთი ფილმის მსოფლიო პრემიერა უკვე გაიმართა, თუმცა ამიერიდან მათ ვარსკვლავებს სარეკლამო ღონისძიებებში მონაწილეობა შეეზღუდებათ. გაფიცვამ ასევე შესაძლოა, "ემის დაჯილდოება" გვიან შემოდგომამდე ან თუნდაც მომავალ წლამდე გადაავადოს, - იტყობინებიან ინდუსტრიის გამოცემები.

ივნისის ბოლოს, ჰოლივუდის მაღალი კლასის მსახიობებმა, მათ შორის მერილ სტრიპმა და ჯენიფერ ლოურენსმა, მსახიობთა გაერთიანების ლიდერებს წერილი მისწერეს, რომელშიც მათ მოუწოდებდნენ, რომ მინიმალური გარიგების პირობებით არ დაკმაყოფილებულიყვნენ.

სცენარისტებისა და მსახიობების გაფიცვა ინდუსტრიის სერიოზულ შეფერხებას გამოიწვევს და ამავდროულად, გავლენას იქონიებს ლოს-ანჯელესის ეკონომიკაზე.

წყარო: theguardian

მოამზადა: ანა სიბოშვილმა