ნიკოლოზ შურღაია - ჩვენი მიზანია ადამიანებს დავანახოთ, რომ ქვეყნის სისუფთავისთვის ზრუნვა თითოეული ჩვენგანის საქმეა
3-5 ივნისს, კურორტ ბაკურიანში მასშტაბური დალაგების ფესტივალი გაიმართა. დალაგების ფესტივალის იდეა საქველმოქმედო ორგანიზაცია „სადაგს“ ეკუთვნის, რომელმაც ასობით მოხალისე და ათასობით თანამოქალაქე ჩააბა ჩვენი ბუნების არ დანაგვიანებასა და დალაგებაზე ზრუნვაში.
ფესტივალზე და „საქართველოს დამლაგებელთა გილდიაზე“ მეტის შესატყობად სადაგის თანადამფუძნებელ და თავმჯდომარე ნიკოლოზ შურღაიას ვესაუბრეთ.
-მოგვიყევით სადაგის შესახებ
-სადაგი მის წევრთა მიერ დაფინანსებული საქველმოქმედო ორგანიზაციაა. ორ წელიწადზე მეტია ჩვენი ქვეყნის დალაგების და მისი ბუნების სისუფთავის დაცვისთვის ვმუშაობთ.
ჩვენი მიზანია ადამიანებს დავანახოთ, რომ ქვეყნის სისუფთავისთვის ზრუნვა თითოეული ჩვენგანის საქმეა. ძალების და იდეების გაერთიანებით შეგვიძლია მოვუაროთ ამ პრობლემას, რომელიც თითოეულ ჩვენგანს და მომავალი თაობის კეთილდღეობას, ესთეტიკურ გარემოს და ჯანმრთლობას ეხება. დავარწმუნოთ თანამოქალაქეები, რომ საკუთარი ქვეყნის და მისი ბუნების მოვლა, გაფრთხილება საკუთარი სახლის მოვლას და გაფრთხილებას ნიშნავს. ამ საქმეში კი თითოეული ქმედება და თითოეული შეცვლილი ჩვევა ღირებულია.
საქართველოს დალაგების საქმეში თითოეული ჩვენი თანამოქალაქის მხარდაჭერის იმედი გვაქვს. გასახარია, რომ ბევრი ადამიანი, ბიზნესი და ორგანიზაცია გვიდგება გვერდით, ვისაც როგორ შეუძლია. ეს მხარდაჭერა იზრდება.
- სიტყვა „სადაგი“ - კვირის დღეს ნიშნავს, რატომ აირჩიეთ ეს სახელწოდება თქვენი ორგანიზაციისთვის?
სახელწოდება „სადაგი“ - ჩვენს ძვირფას წევრს, მწერალ დათო ტურაშვილს ეკუთვნის და როგორც კვირის დღეს ნიშნავს, ასევე საქართველოს დამლაგებელთა გილდიის აბრევიატურაა. ჩვენი გილდია 50-ზე მეტ წევრს ითვლის მათ შორის არიან მომღერალი ქეთი მელუა, მორაგბე ილია ზედგინიძე, ენერგეტიკოსი ლუკა ჩაჩიბაია და ბევრი თავის საქმეში დახელოვნებული ადამიანი და ბუნების ქომაგი.
ბაკურიანის დალაგების ფესტივალის იდეა საიდან გაჩნდა?
ფესტივალის იდეის შთაგონების წყარო იყო შარშან ორი დღის მანძილზე გუდაურში, ადგილობრივი ბიზნესის მიწვევით და ხელშეწყობით ჩატარებული დალაგება. მაშინ, მოხალისეების ჯგუფმა გორიდან და თბილისიდან სამი მთა დავალაგეთ და ორი სატვირთო მანქანის საბარგული გავავსეთ. თავად დალაგების პროცესი, ჩვენი მასპინძლების გულუხვობა და ერთი მიზნით გაერთიანებული ადამიანების თანამშრომლობა უზომოდ სასიამოვნო იყო.
ჩვენმა წევრმა, ავსტრალიელმა ბრეტ ლუბენმა, რომელიც გემის გადამდგარი კაპიტანია შემოგვთავაზა დალაგების მოწყობა ბაკურიანში. სამი წლის წინ ბრეტი მოიხიბლა ბაკურიანის სილამაზით და საქართველოში დასახლდა. მისმა დაუღალავმა შრომამ, წვლილი შეეტანა ბაკურიანის ბუნებრივი სილამაზის აღდგენაში, გადაგვაწყვეტინა დალაგების ფესტივალი მოგვეწყო მის და ბევრი ქართველის საყვარელ კურორტ ბაკურიანში.
ყველაფერი დაიწყო უბრალოდ, კარზე კაკუნით და საინტერესო საქმეში გაერთიანების შეთავაზებით. სადაგის გუნდი ბაკურიანში ჩამოვედით და ადგილობრივი ბიზნესის წარმომადგენლებს ვთხოვეთ დახმარება. როგორც შარშან გუდაურში, წელს ადგილობრივი მოსახლეობა, ბიზნესი და ბაკურიანის განვითარების სააგენტო სიხარულით ჩაებნენ ფესტივალის მოწყობაში. იდეა რამდენიმე მსხვილ ბიზნესსაც მოეწონა და ისინი ფესტივალის სპონსორები გახდნენ. საბოლოოდ, ბაკურიანის დალაგებაში 400-ზე მეტი მოხალისე ჩაერთო, თბილისიდან, გორიდან, ბორჯომიდან და ბაკურიანიდან. მართალია დიდი უმრავლესობა ამ ქვეყნის შვილები ვართ, უცხოელი მოხალისეებიც მრავლად შემოგვეშველნენ.
-დალაგების გარდა, სხვა რა აქტივობები გქონდათ ფესტივალზე?
სამი დღის განმავლობაში, მოხალისეებს საშუალება ჰქონდათ საინტერესო შეხვედრებს დასწრებოდნენ მწერალ დათო ტურაშვილთან და დოქტორ გივი კუპატაძესთან, მოესმინათ მუსიკა- ჯგუფ The Jetbird-ის, ნინუცა გაბისონიასა და ბაჩი ვალიშვილის შესრულებით.
ფესტივალის მესამე დღე მთლიანად დაეთმო ბავშვებს, დაბა ბაკურიანის და ანდეზიტის სკოლის 40-ამდე მოსწავლე შეხვდა დათო ტურაშვილის და keep Georgia Tidy-ის წარმომადგენელ თაკო როდონაიას. ბავშვებმა მოისმინეს საინტერესო ინფორმაცია და რჩევები გარემოს დაცვის შესახებ და ბაკურიანიც ხალისიანად დაასუფთავეს.
ფესტივალის შედეგებს როგორ შეაჯამებდით?
ღონისძიებას მხარი დაუჭირა ცამეტმა სპონსორმა კომპანიამ და შვიდმა ორგანიზაციამ. ღონისძიების გენერალური სპონსორი იყო საინვესტიციო ჯგუფი Wondernet Express. ოქროს სპონსორები იყვნენ: კოხტა მიტარბი, თეგეტა მოტორსი, თეგეტა გრინ პლანეტი, პალიტრა ჰოლდინგი, პარვუს კონსალტინგი, არჩევანი, კრისტალი, ბაკურიანი ინნი და დიდველი გალერეა. სპონსორები - ფინანსური ბიურო, წყალი ბაკურიანი, თელიანი ველი და თბილღვინო. მხარდამჭერი ორგანიზაციები - ბაკურიანის განვითარების სააგენტო, პროკრედიტ ბანკი 44 მოხალისით, FinBureau 77 მოხალისით, ამერიკის სავაჭრო პალატა, Keep Georgia Tidy, ბაკურიანის სკოლა და ანდეზიტის სკოლა.
დასუფთავების შედეგები კი ასეთია : ჩვენ შევაგროვეთ 52, 000 ლიტრი ნარჩენი, სამშენებლო ნარჩენის გარდა, როგორიცაა ლითონის და ხის გისოსები. ასევე მრავლად შეგროვდა მსუბუქი და სატვირთო მანქანის საბურავები, რომელთა გადამუშავებაზე იზრუნებს ჩვენი ოქროს სპონსორი „თეგეტა გრინ პლანეტ“.
R