რუსი მოციგურავეები დიანა დევისი და გლებ სმოლკინი საქართველოს სახელით იასპარეზებენ - დიანა ფიგურული სრიალის ცნობილი მწვრთნელის, ეთერ თუთბერიძის შვილია
რუსეთის ფიგურული ციგურაობის ფედერაციამ მოციგურავე წყვილს დიანა დევისს და გლებ სმოლკინს საქართველოს გუნდში ასპარეზობის უფლება მისცა. სწორედ ამგვარი სათაურებით ქვეყნება სტატიები რუსულ მედიაში.
მათივე ცნობით, ფედერაციამ მათ მოქალაქეობის შეცვლის უფლება მისცა. საქართველოს ციგურაობის ფედერაციას ამ ეტაპზე ოფიციალური კომენტარი არ გაუკეთებია.
დიანა დევისი ეთერ თუთბერიძის ქალიშვილია. თუთბერიძეს სპორტული სამყარო კარგად იცნობს, ის ფიგურულ სრიალში რუსეთის დამსახურებული მწვრთნელია. დიანა დევისის სპორტული პარტნიორი გლებ სმოლკინი მისივე მეუღლეა.
"დევისისა და სმოლკინისგან არანაირი განცხადება არ გაკეთებულა, მაგრამ 22 მაისს მივიღეთ საქართველოდან თხოვნა, რომ საქართველოს სახელით იასპარეზონ“, - ამბობს რუსეთის ფიგურული ციგურაობის ნაკრების მთავარი მწვრთნელი ჩაიკოვსკაია.
მისივე თქმით, სპორტსმენებს ბოლო წელიწადნახევრის განმავლობაში, რუსეთში არც ერთ შეჯიბრში არ მიუღიათ მონაწილეობა,
"მათზე არც ფული დაგვიხარჯავს, რუსეთშიც არ ჩამოსულან, ამიტომ გავუშვით“, - ამბობს ჩაიკოვსკაია.
წყვილი წლების განმავლობაში სწავლობდა აშშ-ში. 2022-2023 წლების სეზონში სპორტსმენებმა არ მიიღეს მონაწილეობა რუსულ ტურნირებში: სმოლკინმა მიიღო ამერიკის მწვანე ბარათი და ამის გამო, ვერ დატოვა შეერთებული შტატები.
ეთერი თუთბერიძის ქალიშვილი ამერიკის შეერთებულ შტატებში დაიბადა, მაგრამ რუსეთში გაიზარდა.
ადრე სოციალურ ქსელში გავრცელდა ინფორმაცია იმის შესახებ, რომ წყვილი ამერიკის ნაკრებში ითამაშებდა, თუმცა დიანა დევისმა ინფორმაცია უარყო. გლების მამამ, მსახიობმა ბორის სმოლკინმა კი ცნობებს "ყალბი" უწოდა.