"გვჯერა, რომ შემდეგი ნაბიჯი საქართველოსთან დიპლომატიური ურთიერთობების აღდგენა იქნება" - სერგეი გავრილოვი

რუსეთის სახელმწიფო დუმის დეპუტატი სერგეი გავრილოვი რუსეთსა და საქართველოს შორის დიპლომატიური ურთიერთობების აღდგენას არ გამორიცხავს. ამის შესახებ რუსმა დეპუტატმა "როსიისკაია გაზეტას“ განუცხადა.

"ჩვენ გვჯერა, რომ შემდეგი ნაბიჯი რუსეთ-საქართველოს ურთიერთობების განვითარებაში დიპლომატიური ურთიერთობების აღდგენა, ელჩების გაცვლა იქნება“, - განაცხადა გავრილოვმა.

მისივე თქმით, ეს შესაძლებელს გახდის, სხვა საკითხებთან ერთად, ორი ქვეყნის მოქალაქეებისთვის სრულფასოვანი საკონსულო მხარდაჭერის არსებობას.

"ასეთი ნაბიჯის შესაძლებლობაზე მიუთითებს საქართველოს თავშეკავებული პოზიცია უკრაინის საკითხზე, მისი ერთგულება დემოკრატიული პრინციპების მიმართ. ჩვენს ხალხებს მჭიდრო ურთიერთობები აკავშირებს, გვაქვს საერთო სულიერი და მორალური ღირებულებები, კულტურა“, - აღნიშნა სერგეი გავრილოვმა.

შეგახსენებთ, მას შემდეგ, რაც 2019 წელს რუსეთის ფედერაციამ საკუთარი გადაწყვეტილებით საქართველოსთან ავიარეისები გააუქმა, თბილისის აეროპორტში რუსული თვითმფრინავი დღეს პირველად დაჯდა. საქართველო-რუსეთს შორის ფრენის აღდგენის შესახებ გადაწყვეტილება კი, რუსეთის პრეზიდენტმა, ვლადიმერ პუტინმა მიმდინარე წლის მაისში მიიღო.