"სექსი არის ერთ-ერთი მშვენიერი რამ, რაც ღმერთმა აჩუქა ადამიანს“ - რომის პაპი

რომის პაპმა ფრანცისკემ "დისნეი +" - ის დოკუმენტურ ფილმში, "პასუხობს პაპი" ახალგაზრდების კითხვებს უპასუხა. პროექტში 20 წლამდე ასაკის 10 ადამიანი მონაწილეობდა.

86 წლის ფრანცისკეს კითხვები დაუსვეს სხვადასხვა თემაზე, მათ შორის, ლგბტ უფლებებზე, აბორტზე, პორნო ინდუსტრიაზე, სექსზე. რწმენაზე, ასევე სექსუალურ ძალადობაზე კათოლიკურ ეკლესიაში.

• "სექსი არის ერთ-ერთი მშვენიერი რამ, რაც ღმერთმა აჩუქა ადამიანს“, - ამბობს რომის პაპი დოკუმენტურ ფილმში.

"საკუთარი თავის სექსუალობის გამოხატვა სიმდიდრეა. ყველაფერი, რაც რეალური სექსუალობის გამოხატვისგან გაფერხებს, გაკნინებს და ამცირებს ამ სიმდიდრეს", - ასე უპასუხა ფრანცისკემ მასტურბაციასთან დაკავშირებულ კითხვას.

პაპს ასევე ჰკითხეს, იცოდა თუ არა, ვის უწოდებენ არაბინალურ ადამიანს, რაზეც დადებითი პასუხი გასცა და თქვა, რომ ლგბტ ადამიანების მიმართ კათოლიკურ ეკლესიას უნდა ჰქონდეს მიმღებლობა.

“ყველა ადამიანი ღვთის შვილია. ღმერთი არავის უარყოფს, ღმერთი მამაა და მე არ მაქვს უფლება რომ ვინმე ეკლესიიდან განვდევნო“, - თქვა მან. აბორტის შესახებ საუბრისას კი აღნიშნა, რომ მღვდლები უნდა იყვნენ მოწყალენი ქალების მიმართ, რომლებმაც ორსულობის შეწყვეტა გადაწყვიტეს, მაგრამ მისივე თქმით, ეს პრაქტიკა მიუღებელია.